Namangan wálayatında sporttıń Regbi-7 túrinen 17 jastaǵı jas óspirimler arasında Ózbekstan chempionatı bolıp ótti.
CHempionatqa mámleketimizdiń barlıq aymaqlarınan komandalar qatnastı hám jarıs juwmaǵında, qaraqalpaqstanlı qızlar komandası birinshi orındı iyelewge miyasar boldı. Nókis temir jolı vokzalında sportshılardı saltanatlı kútip alıw máresimi bolıp ótti.

Onda Qaraqalpaqstan Respublikası Sport ministri E.Qutıbaev, Ózbekstan máhálleleri associaciyası Qaraqalpaqstan Respublikası basqarmasınıń baslıǵı, Ózbekstan Regbi federaciyası Qaraqalpaqstan bóliminiń baslıǵı S.Turmanov, sport pidayıları, jankúyerler menen jeńimpazlardıń ata-anaları qatnastı.
Ilajda shıǵıp sóylewshiler tárepinen sońǵı jılları elimizde Prezidentimizdiń basshılıǵında sport tarawın rawajlandırıwǵa ayrıqsha itibar qaratılıp, sportshılarımızdıń jáhán arenalarında qolǵa kirgizip atırǵan tabısların maqtanısh etip, regbi komandasınıń jetiskenligi menen qızǵın qutlıqlap, aldaǵı jarıslarda da tabıslarǵa erisiwine tilekleslik bildirdi.
-Qızlar komandamız bul jarısta Tashkent, Namangan, Xorezm hám basqa da wálayatlardıń kúshli komandaların jeńip shıǵıwǵa miyasar boldı,-deydi Ózbekstan Regbi federaciyası Qaraqalpaqstan bóliminiń atqarıwshı direktorı Bayrambay Aqımbetov.-Ásirese, Xorezm komandası menen bolıp ótken ushırasıw, oǵada keskin ótip, komandamız ekstra-taymlarda ǵana jeńiske eristi. Aldaǵı waqıtları 13-14-19 hám eresek jastaǵı komandalar arasında da jarıslar shólkemlestiriledi. Nesip etse, bul jarısta da respublikamız jasları ózleriniń kúsh-jigerin kórsetip, chempionlıqtı qolǵa kirgizedi dep oylaymız.
Maǵlıwmat ushın aytatuǵın bolsaq, regbishi qızlarımızdı bul jarısqa Anton Mixaylov hám Jetker Bazarovlar tayarladı.

Adilbay Orazov,
Qaraqalpaqstan xabar agentligi sholıwshısı