Ózbekstan Respublikası Ishki isler ministrligi hám Joqarı bilimlendiriw, ilim hám innovaciyalar ministrliginiń “Ishki isler uyımları aymaqlıq bólimleriniń basshıların joqarı bilimlendiriw shólkemlerine biriktiriw hám huqıqbuzarlıqlar profilaktikasın shólkemlestiriw haqqında”ǵı Birgeliktegi qararı tiykarında Qaraqalpaqstan Respublikası Ishki isler ministriniń orınbasarı – Tergew basqarması baslıǵı tárepinen “Piyshembi profilaktika kúni” múnásibeti menen Berdaq atındaǵı Qaraqalpaq mámleketlik universitetinde profilaktikalıq úgit-násiyatlaw ilajı bolıp ótti.

Ilajdı universitettiń Jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov ashıp berdi hám alıp bardı, – dep maǵlıwmat beredi QMU Baspasóz xızmeti bólimi.
Ótkerilgen ilajda huqıqbuzarlıqlar hám jınayatlardıń júz beriw sebepleri haqqında pikir alısıldı.
Sonday-aq, kiber mákanda júz berip atırǵan jınayatlar hám olarǵa imkaniyat berip atırǵan sharayatlar dodalandı.
Student-jaslar taraw qánigelerinen ózlerin qızıqtırǵan barlıq sorawlarına juwap aldı.

Qaraqalpaqstan xabar agentligi