Ózbekstan Respublikası Bas ministriniń orınbasarı – ekonomika hám qarjı ministri Jamshid Qwchqorov hám Jáhán bankiniń operaciyalar boyınsha basqarıwshı direktorı Anna Berde basshılıǵındaǵı delegaciya aǵzaları arasında ushırasıw bolıp ótti.

Sóylesiw waqtında tárepler jáhán ekonomikasındaǵı sońǵı tendenciyalar, mámleketnbń ekonomikalıq ósiwiniń turaqlılıǵı hám oǵan tásir etiwshi faktorlar, sonıń ishinde, jasalma intellektten nátiyjeli paydalanıw, jańa jumıs orınların jaratıw, zamanagóy texnologiyalardı tartıw hám xalıqaralıq sawdada Jáhán sawda shólkeminiń ornı haqqında hár tárepleme pikir alıstı.
Ásirese, infrastruktura, densawlıqtı saqlaw, turizm, awıl xojalıǵı hám sanaat tarawlarında sapalı jumıs orınların jaratıw tiykarǵı wazıypalardan biri ekenligi ayrıqsha atap ótildi. Sonday-aq, Ózbekstanda alıp barılıp atırǵan sociallıq-ekonomikalıq reformalar, makroekonomikalıq turaqlılıqtı támiyinlew, byudjet siyasatı nátiyjeliligin arttırıw, inflyaciya dárejesin maqsetli kórsetkishlerde uslap turıw, mámleketlik-jeke menshik sheriklik tiykarında ámelge asırılıp atırǵan infrastrukturalıq joybarlar, mámleketlik kárxanalardı trasformaciyalaw, menshiklestiriw processleri, energiya nátiyjeliligin arttırıw, jasıl hám turaqlı ıssılıq sistemasın qáliplestiriw hám transport-logistika sistemasın rawajlandırıw sıyaqlı baǵdarlar da dodalaw orayında boldı.
Jáhán bankiniń wákilleri Ózbekstanda makroekonomikalıq turaqlılıqtı támiyinlew hám ekonomikalıq ósiw boyınsha ámelge asırılıp atırǵan ilajlarǵa joqarı baha berdi. Ushırasıw juwmaqlarına bola, tárepler óz-ara birge islesiwdi jáne de bekkemlew, joqarıda tilge alınǵan tarawlarda pikir hám tájiriybe almasıwdı keńeytiw hám ulıwmalıq maqsetlerge erisiw ushın sistemalı hám nátiyjeli birge islesiwdi dawam ettiriwge kelisip aldı.

N.Ziyodullaeva, ÓzA