Vena qan-tamırdan, kapillyar qan bolsa barmaqtan alınadı. Ekinshisiniń bir qatar kemshilikleri bar.

Tiykarǵı kemshiligi barmaqtan qan 2 ml ǵa shekem alınıwı múmkin. Bul tek ǵana ulıwmalıq qan testi hám glyukoza testi ushın jeterli. Basqa izertlewler ushın 2,5ten 10 mlǵa shekem qan kerek boladı hám eger bir waqıttıń ózinde bir neshe testler bolsa, shama menen 30 ml kerek bolıwı múmkin.

Barmaqtan bunday muǵdarda qan sıǵıp bolmaydı.
Bunnan tısqarı, kapillyar qandı alıwda qan kletkaları zaqımlanıwı múmkin.
Barmaq tesiliwi waqtında teri kóbirek zaqımlanǵanlıǵı sebepli biomaterialǵa toqımalar hám kletka ishindegi suyıqlıqlar, sonday-aq, qan jibiw faktorları túsiwi múmkin. Bul elementler test nátiyjelerine kesent etiwi múmkin.
Barmaqtan qan tek ǵana úsh jasqa shekemgi balalardan klinikalıq qan tekseriwi, glyukoza, xolesterin, AST, ALT, ulıwmalıq hám tikkeley bilirubin, belok hám kretinin ushın alınadı.
Úlken jastaǵılarda barmaqtan qan alıw usınıs etilmeydi, sebebi kapillyar qanda gemoglabin hám gematokrit venoz qanǵa qaraǵanda joqarı, kaliy, kalciy hám ulıwmalıq protein muǵdarı tómen boladı. Glyukoza kórsetkishlerinde de kishi ayırmashılıqlar bar.
Bunnan tısqarı, venoz qan kislorodtan ayırılıp, toqımalardıń gaz almasıwı nátiyjesinde karbonat angidrid penen bayıtıladı.
Sonıń ushın jası úlkenler venoz qan tapsırıwı kerek. Biraq ayırım jaǵdaylarda medicina xızmetkerleri kapillyar úlgi alıwına tuwra keledi.
Tamırdan hám barmaqtan qan testine tayarlıq kóriwde ayırmashılıq bar ma?
Qan tapsırıwdan aldın anıqlawıńız kerek bolatuǵın bir nárse – onı ash qarınǵa tapsırıwı kerek pe yamasa joq ekenligin biliw. Hám bul qan alınatuǵın orınǵa emes, al tekseriletuǵın analizge baylanıslı.
Klinikalıq qan testin jeńil azanǵa awqatlanıwdan keyin 2-3 saat ótkennen soń alıw múmkin. Biraq glyukoza, xolesterin hám gormonlar ushın qan testleri qatań túrde ash qarınǵa alınadı.
Eger sizde bunday analizler buyırılǵan bola, qan tapsırıwdan 8-12 saat aldın awqatlanbawıńız kerek.
Qan tapsırıwda bolsa aldınnan 1-2 stakan suw ishiw usınıs etiledi.
Deneńizde jeterli muǵdarda suyıqlıq bolsa, analiz alıwdı ańsatlastıradı.
Shıpaker sizge test ótkeriw ushın jollama bergeninde, qan tapsırıwdan aldın awqat jewińiz múmkin be yamasa joq pa, sonı sorań.

Qaraqalpaqstan xabar agentligi