Usı jıl 11-aprel kúni Qaraqalpaqstan Respublikası Joqarǵı Keńesiniń úshinshi sessiyası bolıp ótti.

Sessiyaǵa Ózbekstan Respublikası Oliy Majlisi Senatı hám Húkimet aǵzaları, sektor hám taraw basshıları, ǵalaba xabar qurallarınıń wákilleri qatnastı.

Dáslep Ózbekstan hám Qaraqalpaqstan Resublikalarınıń mámleketlik gimnleri atqarıldı.
Sessiyanı Qaraqalpaqstan Respublikası Joqarǵı Keńesiniń Baslıǵı A.Orınbaev ashtı hám basqarıp bardı.
Sessiya «Qaraqalpaqstan» telekanalı arqalı tikkeley efirden berilip barıldı.
Sessiya kún tártibindegi dáslepki másele Qaraqalpaqstan Respublikasınıń «Jer haqqındaǵı» Nızamına ózgerisler hám qosımshalar kirgiziw haqqında»ǵı Qaraqalpaqstan Respublikası Nızamınıń joybarı tuwralı bolıp, bul másele boyınsha Joqarǵı Keńestiń agrar, suw xojalıǵı, tábiyattı qorǵaw hám ekologiya máseleleri komiteti baslıǵı A.Jumanazarov bayanat jasadı. Bul Nızam joybarı menen «Jer haqqındaǵı» Nızamnıń bir qatar statyalarına ózgeris hám qosımshalar kirgizilmekte.
Nızam joybarınıń qabıl etiliwi Qaraqalpaqstan Respublikasına investiciyalardı jáne de keńnen tartıw hám aymaǵımızdıń sociallıq hám ekonomikalıq rawajlanıwın jańa basqıshqa alıp shıǵıwǵa xızmet etedi. Kún tártibindegi bul másele tolıq kórip shıǵılıp, deputatlar tárepinen qarar qabıl etildi.
Kún tártibindegi keyingi másele Qaraqalpaqstan Respublikası Densawlıqtı saqlaw ministrligine Parlamentlik soraw jiberiw tuwralı bolıp, bul másele boyınsha Joqarǵı Keńestiń Sociallıq-mádeniy rawajlanıw, jaslar siyasatı, turizm hám jámiyetlik birlespeler máseleleri komiteti baslıǵı M.Atamuratov bayanat jasadı.
Onda onkologiyalıq keselliklerdi erte basqıshta anıqlaw, analıqtı hám balalıqtı qorǵaw, sırt el kompaniyalarınıń dárilerin tiykarsız buyırıw jaǵdaylarına shek qoyıw, tarawda byudjet qarjılarınıń maqsetli jumsalıwın támiyinlew hám korrupciyaǵa qarsı gúresiw baǵdarındaǵı unamsız jaǵdaylarǵa alıp keletuǵın sebep hám sharayatlar, olardıń aqıbetleri boyınsha analizlengen jumıslar hám basqa da máseleler keń túrde sóz etildi.
Bul másele de tolıq kórip shıǵılıp, deputatlar tárepinen arnawlı qarar qabıl etildi.
Kún tártibindegi keyingi másele Ózbekstan Respublikası Prezidentiniń «Ózbekstan Respublikasında sharwashılıq tarawı hám onıń tarmaqların rawajlandırıw boyınsha 2022-2026-jıllarǵa mólsherlengen baǵdarlamasın tastıyıqlaw haqqında»ǵı qararı talaplarınıń Qaraqalpaqstan Respublikasında orınlanıw barısı boyınsha Ministrler Keńesiniń esabatı tuwralı bolıp, bul másele boyınsha Ministrler Keńesi Baslıǵınıń awıl hám suw xojalıǵı máseleleri boyınsha orınbasarı – Awıl xojalıǵı ministri Sh.Teshaev bayanat jasadı.
Bul másele de tolıq qarap shıǵıldı hám deputatlar tárepinen tiyisli qarar qabıl etildi.
Keyingi másele – puqaralardıń huqıqların qorǵaw, jınayatshılıqtıń aldın alıw hám jınayatshılıqqa qarsı gúresiw baǵdarında 2024-jılda ámelge asırılǵan jumıslar haqqında Qaraqalpaqstan Respublikası prokurorı E.Tadjievtiń málimlemesi tıńlandı. Bul másele de tolıq kórilip, deputatlar tárepinen qarar qabıl etildi.
Kún tártibindegi keyingi másele Oraylıq banktiń Qaraqalpaqstan Respublikası Bas basqarması tárepinen 2024-jıl dawamında ámelge asırılǵan jumısları haqqında Oraylıq banktiń Qaraqalpaqstan Bas basqarması baslıǵınıń esabatı tuwralı bolıp, bul másele boyınsha Bas basqarma baslıǵı A.Isakov bayanat jasadı.
Qaraqalpaqstan Respublikası aymaǵında 13 kommerciyalıq bank hám olardıń qala hám rayonlardaǵı 89 bank xızmetlerin kórsetiw orayları, mini bankleri tárepinen xalıqqa zamanagóy bank xızmetleri kórsetilip kelinbekte. 2025-jıldıń 1-yanvar jaǵdayına xalıqtıń hám xojalıq júrgiziwshi subektlerdiń banklerdegi depozitleriniń kólemi ótken jıldıń usı dáwirine salıstırǵanda 33,7 procentke kóbeydi.
Naq pulsız esap-sanaqlar sistemasın jáne de rawajlandırıw boyınsha kórilip atırǵan ilajlar nátiyjesinde aylanısqa shıǵarılǵan plastik kartochkalar sanı 2 mln. 550 mıńǵa, sawda hám tólemli xızmet kórsetiw shaqapshalarına ornatılǵan tólem terminallarınıń sanı 21 mıń 696 ǵa jetti. Mashqalalı kredit qarızdarlıqlardı qısqartıw boyınsha da ilajlar alıp barılmaqta. Gezektegi bul másele boyınsha deputatlar tárepinen tiyisli qarar qabıl etildi.
Bunnan soń Ózbekstan Respublikası Prezidentiniń «Ózbekstan máhálleleri associaciyası jumısın jolǵa qoyıw hám máhállelerde basqarıw sistemasın jetilistiriwge baylanıslı qosımsha ilajlar haqqında»ǵı qararınıń aymaqlarda orınlanıwı boyınsha Máhálleler associaciyası Qaraqalpaqstan Respublikası basqarması baslıǵınıń esabatı tuwralı bolıp, bul másele boyınsha basqarma baslıǵı S.Turmanov bayanat jasadı. Bul másele de tolıq qarap shıǵıldı hám deputatlar tárepinen qarar qabıl etildi.
Sessiya májilisinde Joqarǵı Keńes Prezidiumınıń tiyisli qararları tastıyıqlandı.
Usınıń menen Qaraqalpaqstan Respublikası Joqarǵı Keńesiniń úshinshi sessiyası óz jumısın juwmaqladı.

Qaraqalpaqstan xabar agentligi