Sońǵı kúnleri sociallıq tarmaqlarda mámleketimizde erte piser piyaz bahasınıń qımbatlaǵanı boyınsha bir qatar xabar hám jańalıqlar tarqaldı.

Bul jaǵday boyınsha Awıl xojalıǵı ministrligi baspasóz xızmeti tómendegilerdi málim etti.
Atap ótiliwinshe, 2024-jıl may-iyun aylarında piyazdıń bahası 500-1000 sumǵa túsip ketkeni sebepli usı jılı Jizzaqta 5 mıń gektar, Nawayıda 6,7 mıń gektar, Namanganda 8,4 mıń gektar, Samarqandta 14 mıń gektar, Surxandáryada 2,6 mıń gektar, Sırdáryada 2,8 mıń gektar, Tashkentte 2,6 mıń gektar, Xorezmde 7,6 mıń gektar az piyaz egilgen.
Soǵan qaramastan, respublikamızda bıyıl jámi 1 412 mıń tonna piyaz jetistiriliwi kútilmekte. Bul ótken 2024-jılǵa qaraǵanda 12 mıń tonnaǵa kóp.
Salıstırıw ushın 2024-jıl 1-aprelde jańa piyazdıń bahası 5-6 mıń sumdı quraǵan bolsa, 7-aprelde piyazdıń bahası 3-3,5 mıń sumǵa shekem túsken. Bıyıl 1-aprelde jańa piyaz 7-8 mıń sumdı quraǵan bolsa, házirgi kún jaǵdayına baha 4-5 mıń sumǵa shekem arzanlasqan.
Sonday-aq, 2024-jıldıń óniminen rezervke alınǵan 121 mıń tonna piyazdıń 75 mıń tonnası usı kúnge shekem ishki tutınıw bazarına sawdaǵa shıǵarılǵan, qalǵan 46 mıń tonna piyaz házirgi kúnde 2-3 mıń sumnan satılmaqta. Pisiw dáwirine qarap usı jıldıń 15-aprelinen piyazdıń bahası 2-2,5 mıń sumǵa shekem arzanlawı kútilmekte. Bunnan tısqarı, aprel ayınıń 2-3-dekadaları 70 mıń tonna, may ayında bolsa 90 mıń tonnadan artıq piyazdıń pisip jetilisiwi kútilmekte.
Taraw wákilleriniń atap ótiwinshe, hár bir máwsimde awıl xojalıǵı eginleriniń birinshi pisken waqtında bahalardıń kóteriliwi baqlanadı. Biraq, bul waqtınsha jaǵday bolıp esaplanadı.
Ayırım aymaqlarda diyqanlar ádettegiden artıq qarjı talap etiwshi innovaciyalıq agrotexnikalıq ilajlardı qollanıw arqalı óz ónimin ádettegidey 10-15 kún aldın jetistirip bazarǵa shıǵaratuǵını hesh kimge sır emes. Bul awıl xojalıǵı ónimlerine bolǵan talaptıń ózine tánligin keltirip shıǵarıw menen birge, bazar principlerine muwapıq baha belgileniwine faktor boladı.

Muhayyo Toshqoraeva,
ÓzA