Qırǵız Respublikasınıń paytaxtı – Bishkek qalasında Oraylıq Aziya mámleketleri kásiplik awqamları Keńesiniń VII májilisi bolıp ótti, dep xabar beredi xs.uz.

Region kásiplik awqamları háreketi hám birge islesiwinde áhmiyetli orınǵa iye bul abıraylı ánjumanda milliy kásiplik awqam shólkemleri, mámleketlik uyımlar hám xalıqaralıq shólkemlerdiń wákilleri qatnastı.
Májiliste Oraylıq Aziya mámleketleri kásiplik awqamları Keńesiniń bas xatkeri Murodil Jumadilde ulı, Ózbekstan kásiplik awqamları Federaciyasınıń baslıǵı Qudratilla Rafiqov, Qazaqstan kásiplik awqamları Federaciyası baslıǵı Satıbaldı Dauletalin, Tájikstan ǵárezsiz kásiplik awqamları Federaciyası baslıǵınıń birinshi orınbasarı Ismoil Fayzizoda, Túrkmenstannıń Lebop kásiplik awqamları birlespesiniń baslıǵı Amangeldi Jumaev, Mongoliya kásiplik awqamları Konfederaciyasınıń vice-prezidenti Bayaraa Ragchaa qatnastı.
Ilajda kadrlardıń imkaniyatın rawajlandırıw, jaslardıń siyasatın bekkemlew, kásiplik awqamları ushın qánigeler tayarlaw sistemaların jetilistiriw, sociallıq birge islesiw mexanizmlerin keńeytiw sıyaqlı máseleler dodalandı.
Ózbekstan kásiplik awqamları Federaciyasınıń baslıǵı Qudratilla Rafiqov óziniń bayanatında regiondaǵı búgingi tınıshlıq hám turaqlılıq, mámleketleraralıq birge islesiw jańa mánis-mazmunǵa iye ekenliginiń negizinde aymaqtaǵı mámleketler basshılarınıń birgeliktegi aqılǵa uǵras qararları, siyasiy erk-ıqrarı hám isenimlilik kórsetip atırǵanın, jaqında ǵana Xojend qalasında bolıp ótken Qırǵızstan, Tájikstan hám Ózbekstan Prezidentleriniń ushırasıwı usıǵan ayqın mısal bola alatuǵının atap ótti. Sonday-aq, jıllar dawamında jıynalıp qalǵan mashqalalar da óz sheshimin tawıp atırǵanı, óz-ara birgeliktegi iri joybarlar ámelge asırılıp atırǵanı atap ótildi.
Atap ótilgenindey, Qırǵızstan húkimeti tárepinen Ózbekstan kásiplik awqamları Federaciyasına Íssıkólden on gektar jer maydanı ajıratılǵan bolıp, usı aymaqta xalıqaralıq talaplarǵa juwap beretuǵın kásiplik awqamları sanatoriy kompleksi qurılmaqta.
Sonıń menen birge, Q.Rafiqov usı jıl iyul ayınıń sońında Ózbekstanda kásiplik awqamları shólkemleriniń doslıq festivalınıń ótkeriliwi, onda regiondaǵı barlıq qońsı mámleketler, sonday-aq, Túrkiy tilles mámleketler wákilleriniń qatnasıwı kútilip atırǵanın qanaatlanıwshılıq penen atap ótip, bul ilaj tuwısqan xalıqlarımız arasındaǵı doslıq hám jaqsı qońsıshılıq qatnasıqların jáne de rawajlandırıwǵa xızmet etetuǵının atap ótti.
Oraylıq Aziya mámleketleri kásiplik awqamları Keńesiniń VII májilisi óz-ara regionallıq qatnasıqlardı jáne de bekkemlew, usı proceslerde kásiplik awqamlarınıń ornın hám rolin arttırıw, áhmiyetli sociallıq máselelerdi sheshiwde birge islesiw jolındaǵı áhmiyetli qádem bolıp esaplanadı.

Qaraqalpaqstan xabar agentligi