Ózbekstan Respublikası Prezidenti Shavkat Mirziyoev 10-aprel kúni Jáhán banki toparınıń operaciyalar boyınsha basqarıwshı direktorı Anna Berde basshılıǵındaǵı delegaciyanı qabılladı.

Ózbekstannıń Jáhán banki menen keń kólemli strategiyalıq birge islesiwin bunnan bılay da rawajlandırıw, bárinen burın, usı global qarjı institutı tárepinen elimizde ámelge asırılıp atırǵan ekonomikalıq reformalar strategiyasın qollap-quwatlaw máseleleri kórip shıǵıldı.
Ushırasıw basında Anna Berde mámleketimiz basshısına Jáhán banki prezidenti Ajay Banganıń sálemin hám jaqsı tileklerin jetkerdi.
Keyingi jıllarda sheriklik qatnasıqları joqarı dárejege shıǵıp, salmaqlı nátiyjelerdi berip atırǵanı úlken qanaatlanıwshılıq penen atap ótildi.
Búgingi kúnde Ózbekstan banktiń eń iri birge islesiwshilerinen biri bolıp tabıladı. Joybarlar portfeli 12 milliard dollardan astı. Jáhán banki ekonomikanıń áhmiyetli tarmaqları hám sociallıq tarawdıń turaqlı rawajlanıwın támiyinlewge qaratılǵan reformalardı ámelge asırıwda qarjılay, konsultativ hám texnikalıq jaqtan járdem kórsetpekte.
Banktiń járdemi menen xalıqaralıq qarjı institutlarınıń qatnasıwında joybarlar mexanizmi jetilistirildi, olardı tayarlawdı jedellestiriw hám sapasın arttırıw boyınsha jańa tártip qabıl etildi.
Kámbaǵallıqqa qarsı gúresiw, bárinen burın, turizm tarawında hayal-qızlar hám jaslar ushın jumıs orınların jaratıw, jeke sektordı hám mámleketlik-jeke menshik sheriklikti rawajlandırıw baǵdarlamaların qollap-quwatlaw, mámleketlik kárxanalardı transformaciyalaw hám menshiklestiriw sıyaqlı baǵdarlar aldaǵı ámeliy sherikliktiń áhmiyetli baǵdarları sıpatında atap ótildi.
Uglerod shıǵındıların azaytıw, urbanizaciya hám infrastrukturanı modernizaciyalaw, energiya nátiyjeliligin arttırıw, investiciyalıq ortalıqtı jaqsılaw, elimizdiń JSShǵa aǵza bolıwına járdemlesiw baǵdarında birge islesiw rejelerine ayrıqsha itibar qaratıldı.
Iri regionallıq joybarlardı alǵa qoyıw máseleleri boyınsha da pikir alısıldı.

ÓzA