Hár bir millettiń maqtanıshına aylanǵan ullı hám ápsanawiy shaxsları boladı. Ullı jáhángir babamız Ámir Temur áne sonday milletimizdiń maqtanıshına aylanǵan tımsalsız tulǵa.

Usı kúnlerde mámleketimiz boylap Sahıpqıran Ámir Temur tuwılǵan kúniniń 689 jıllıǵına baǵıshlanǵan saltanatlı ilajlar, ánjumanlar, ilimpazlardıń qatnasıwında sóylesiwler, ushırasıwlar bolıp ótpekte. Dástúrge bola, paytaxtımızdıń Ámir Temur atı menen atalıwshı gózzal hám payızlı parkinde de jáhángir babamızdıń qutlı tuwılǵan kúni sánesine baǵıshlanǵan saltanatlı ilaj ótkerildi.

Onda Ózbekstan Respublikası Prezidenti Administraciyası, Ózbekstan Respublikası Ministrler Kabinetiniń juwapkerleri, hár qıylı ministrlik hám uyımlar, dóretiwshilik hám jámiyetlik shólkemlerdiń xızmetlerleri, jazıwshı hám shayırlar, áskerler, mádeniyat hám kórkem óner ǵayratkerleri, ilimpaz hám izertlewshiler, student-jaslar, mámleketimizde akkreditaciyadan ótken diplomatiyalıq korpus hám xalıqaralıq shólkemlerdiń wákilleri, sırt el miymanları qatnastı.

Xalıqaralıq Ámir Temur qayırqomlıq jámiyetlik fondı baslıǵı, Ózbekstan xalıq jazıwshısı Muhammed Ali mámleketimizde tariyxımızdı tereń hám tolıq úyreniw, ásirese, ullı Sahıpqıran Ámir Temur hám temuriyler dáwiri menen baylanıslı ótmish betlerine itibardı jáne de kúsheytiw, bul baǵdarda respublikamız hám sırt eldegi ilimiy dereklerge múrájat etiwge baylanıslı iygilikli jumıslardıń qamtıp alınıwı jáne de keńeygenin atap ótti.

Haqıyqatında da, Ámir Temur ómiri, miynet jolındaǵı ibratlı tárepleri onıń ullı atın dúnya tariyxınıń eń jarqın betlerine alıp shıqtı. Sol sebepli onıń atı dúnyada tereń húrmet, úlken izzet penen atap ótiledi.

Házirgi waqıtta AQSh puqarası bolǵan awǵanstanlı ilimpaz, Yunus Rajabiy atındaǵı Ózbek milliy muzıka kórkem óneri institutınıń professorı, tilshi, ádebiyattanıwshı hám publicist Azizullo Orol jáhángir Ámir Temur hám temuriyler miyrası haqqında sóz etti.

– Ullı insan Ámir Temurdı bir waqıtları óz milletinen uzaqlastırıwǵa, onıń ómiri, ótmishin qálbekilestiriwge umtılıwdan tartınbadı,-dedi Azizullo Orol. -Ǵárezsizlik jıllarında Ámir Temurdıń pák atın qayta tiklewge erisildi. Jańa Ózbekstanda ullı ilimpazlar, jáhángir babalarımız tariyxın, ibratlı miynet jolı hám ómirin, iygilikli súrenleri hám ámellerin úyreniwge úlken itibar qaratılmaqta. Ámir Temur óz ómiri dawamında jaratqan dóretiwshilik, sociallıq ádillik, haqıyqatshıllıq sıyaqlı principler, onıń «Kúsh-ádillikte» degen iygilikli súreni búgin Prezident Shavkat Mirziyoev tárepinen ámelge asırılıp atırǵan iygilikli reformalarda óz kórinisin tappaqta.

Saltanatlı ilajda xalıqaralıq áskeriy sport jarıslarınıń jeńimpazları, Qorǵanıw ministrligi áskeriy xızmetkerleri Alishoh Abdullaev, Shohruh Jovqochev AQShta áskeriy xızmet boyınsha ótkerilgen xalıqaralıq jarısta erisken jetiskenlikleri, usı tabıslar tiykarında mámleketimizde Prezident Shavkat Mirziyoev tárepinen jaslar ushın jaratılǵan sharayatlar jámlengenin ayrıqsha atap ótti.

Belgili shayır, Ózbekstan Respublikasında xızmet kórsetken mádeniyat xızmetkeri Sharifa Salimova Sahıpqıran Ámir Temurǵa baǵıshlap jazǵan jańa qosıǵın oqıp berdi.

Bizge belgili, Sahıpqırannıń diplomatiyalıq imkaniyatı ayrıqsha tariyxıy temaǵa tiykar. Ámir Temur janına kelgen ispan elshisi Rui Gonsales de Klavixo bul haqqında óziniń pikirlerinde tereń húrmet penen keltirilgen. Sahıpqıran janına kelgen ispan elshisi Rui Gonsales de Klavixo monologin jas talant iyeleri saltanatlı ilajda oqıdı.

Qorǵanıw ministrligi sistemasındaǵı «Húrmetli qarawıl» bólimi hám jawıngerlik topardıń kórgizbeli shıǵıwları kórsetildi, ministrliktiń Oraylıq muzıka hám ayaq oyın ansambliniń qosıqshıları tárepinen áskeriy watansúyiwshilik temasındaǵı qosıqlar atqarıldı.

Jáhángir Ámir Temur esteligine gúller qoyıldı.

Saltanatlı ilajda Ózbekstan Respublikası Prezidentiniń keńesgóyi Xayriddin Sultonov qatnastı.

Ullı Sahıpqıran tuwılǵan kúnine baǵıshlanǵan saltanatlar paytaxıtımızdaǵı Temuriyler tariyxı mámleketlik muzeyindegi iri xalıqaralıq ánjumanda, sonday-aq, oqıwshılar ushın ekskursiyalar, dóretiwshilik tańlaw hám viktorinalar menen dawam etti.

Nazokat USMONOVA,

ÓzAnıń xabarshısı