2025-jıl 5-9-aprel kúni paytaxtımız Tashkent qalasında Parlamentleraralıq Awqamnıń 150-yubiley Assambleyası bolıp ótti.

Oǵan usı shólkemge aǵza bolǵan mámleketler parlamentleri, parlamentleraralıq shólkemlerden 2 mıńnan aslam delegat qatnastı. Assambleya jumısın júzlegen xalıqaralıq shólkemler, sırt elli hám jergilikli ǵalaba xabar quralları tikkeley baqlap bardı.

Ózbekstan Prezidentiniń baslaması menen Tashkentte parlamentler menen baylanıslı bunday keń kólemli abıraylı ánjuan tek ǵana Ózbekstannıń emes, al Oraylıq Aziya tariyxında birinshi márte regionımızda ótkerilgenin atap ótiw kerek.

Derlik bir hápte dawam etken abıraylı xalıqaralıq ánjuman parlamentleraralıq sóylesiw, óz-ara birge islesiw hám tınıshlıq jolında birlesiw ruwxı menen yadta qaldı.

“Sociallıq rawajlanıw hám ádalat ushın parlament háreketi” temasına baǵıshlanǵan ilajda kámbaǵallıqtı saplastırıw, múnásip miynet sharayatların jaratıw, sociallıq inklyuzivlerdi qollap-quwatlaw hám qarar qabıllaw processinde kemsitilgen toparlardıń qatnasıwın keńeytiw sıyaqlı máseleler assambleyada dodalaw orayında boldı.

Assambleya jumısındaǵı áhmiyetli ilajlar, jalpı májlislerdi Parlamentleraralıq Awqam Prezidenti Tuliya Ekson, Parlamentleraralıq Awqamnıń Bas xatkeri Martin CHungong, Ózbekstan Respublikası Oliy Majlisi Senatı Baslıǵı, usı assambleya Prezidenti etip saylanǵan Tanzila Narboeva basqarıp bardı.

Parlamentelaralıq Awqamnıń basshılıǵı Ózbekstanda ámelge asırılǵan reformalar, atap aytqanda, parlamentte hayal-qızlardıń sanın dúnyadaǵı ortasha kórsetkish (26 procent)ten biraz joqarı ekenin atap ótti.

Assambleya qatnasıwshaları tárepinen Tashkent – parlament diplomatiyasınıń paytaxtına aylanǵanı qayta-qayta tilge alındı. Haqıyqatında da, bul májilis global jámiyetshilik dus kelip atırǵan mashqalalar, qarama-qarsılıqlar hám kelispewshiliklerdi sóylesiw arqalı sheshiw múmkin ekenin kórsetetuǵın áhmiyetli maydan wazıypasın atqardı.

Assambleyaǵa Ózbekstan Respublikası Prezidenti Shavkat Mirziyoev qatnasıp, shıǵıp sóylegeni ánjuman qatnasıwshılarında úlken tásir qaldırdı.

Assambleyanıń juwmaqlawshı sessiyasında Tanzila Narboeva barlıq qatnasıwshılarǵa tereń minnetdarshılıq bildirdi. Bul Assambleya tek ǵana tariyxıy sáneni belgilew emes, al parlamentleraralıq birge islesiwde jańa dáwir baslanǵanınıń simvolikalıq kórinisi ekenin atap ótti.

Juwmaqlawshı sessiyada Tuliya Ekson, Martin CHungong shıǵıp sóylep, assambleyanıń joqarı dárejede ótkerilgeni, Ózbekstan tárepinen sharayat hám shólkemlestiriw jumısları joqarı dárejede shólkemlestirilgenin ayrıqsha atap kórsetti.

Assambleyanıń eń áhmiyetli waqıyalarınan biri – Tashkent deklaraciyasınıń qabıl etilgeni boldı. Bul hújjette xalıqaralıq parlamentleraralıq birge islesiwdi tereńlestiriw, tınıshlıq, turaqlı rawajlanıw hám insan huqıqların qorǵaw boyınsha áhmiyetli principlerge itibar qaratıldı. Leklaraciya dúnya parlamentleri arasında tilekleslikti bekkemlew hám keleshek áwladlar ushın turaqlı siyasiy ortalıq jaratıw jolında áhmiyetli basqısh bolıp xızmet etedi.

Assambleya sheńberinde Turaqlı komitetlerdiń rezolyuciyaları, ayrıqsha másele boyınsha qarar hám ulıwma dodalawdıń juwmaqlawshı hújjeti qabıl etildi. Parlamentleraralıq Awqamnıń basqarıw keńesi de óz jumısın tabıslı juwmaqladı.

 Norgul ABDURAIMOVA,

ÓzAnıń xabarshısı