Adamgershilik – ullı pazıylet. Miyrim-shápáát, ózgelerge jaqsılıq islew menen jasaw insannıń adamgershilik pazıyletleriniń biri. Qaraqalpaqstan Respublikası Joqarǵı Keńesiniń deputatı Alisher Djumanazarov ta mine usınday principlerge ámel etip jasaydı.

Deputat rayonda tájiriybeli isbilermen sıpatında tanılǵan. Mámleketimizde Prezidentimizdiń basshılıǵında alıp barılıp atırǵan keń kólemli reformalardı basshılıqqa ala otırıp, eldiń rawajlanıwı, rayon hám awıl xalqınıń awırın jeńil etiw, sociallıq járdem, kámbaǵallıqtan abadanlıqqa qaray principi, bántlik hám isbilermenlikke endi kirip kiyatırǵan jas isbilermenlerge ámeliy hám materiallıq járdem kórsetiw baǵdarında alıp barıp atırǵan iygilikli jumısları bársheni quwandırmaqta.

A.Djumanazarov pidayı, xalıqshıl, qayırqom isbilermen bolıw menen birge, deputat sıpatında da xalıqtıń húrmetine erisip kelmekte. Onıń tikkeley háreketleri menen Nókis rayonınıń “Samanbay,” “Úlgili mákan,” “Aqmanǵıt,” “Diyqan arna” hám “Taqırkól” máhálleleri kúnnen -kúnge abat bolıp barmaqta. Xalıq wákiliniń itibarı hám ǵamxorlıǵı sebepli “Úlgili mákan” MPJda xalıq ushın bir qatar qolaylıqlar jaratıldı. Xalıqtıń múrájatleri tiykarında ishki jollar tártipke keltirilip, qum-shaǵıl tas aralaspası tóseldi. Deputattıń járdeminde 19-sanlı mektep aymaǵın suwǵarıw ushın artizan qudıǵı qazıp berildi. Bos jatırǵan taslandı hám qarawsız qalǵan 1 gektarǵa shamalas maydandı kóklemzarlastırıw hám terek nállerin egiw ushın traktor járdeminde tegislew jumısları alıp barıldı. “Bessaǵa” awılında 500 ge shamalas xojalıqta jasawshı puqaralardıń kún dawamında mánzillerine óz waqtında jetip barıwında mashqalalar bar ekenligi sebepli, jańa avtobus qatnawı jolǵa qoyıldı. Avtobus qatnawlarınıń jolǵa qoyılıwı awıl xalqı, ásirese, 4-sanlı ulıwma bilim beriw mektebiniń oqıwshıları ushın úlken qolaylıq jarattı.

-Húrmetli Prezidentimizdiń basshılıǵında xalqımızdıń turmıs sharayatın jaqsılaw, insan mápin barlıq nárseden ústin qoyıp, kámbaǵallıqtan abadanlıqqa erisiw, jaslardıń bántligin támiyinlew hám qorshaǵan ortalıqtı qorǵaw ushın kóklemzarlastırıw jumısları alıp barılıp atırǵan bir payıtta xalqımız biz deputatlardan úlken juwapkershilik hám deputatlıq minnetlemeni kúteri anıq. Bul minnetleme meni bárqulla xalqımızdıń turmıs jaǵdayın jaqsılawǵa degen wazıypalardı ámelge asırıwǵa baslamaqta. Xalqımızda “Sawaplı isti hár kim, hár qashan islew kerek” degen danalıq sóz bar. Qayırlı isler islew, mútájlerge járdem qolın sozıw – insannıń eń joqarı pazıyletlerinen biri bolıp esaplanadı. Solay eken, biz hár birimiz imkaniyatımızǵa qaray átiraptaǵılarǵa járdem beriwge háreket etiwimiz kerek, – deydi deputat Alisher Djumanazarov.

Xalıq wákili mine usınday qayırqomlıqqa jáne bir márte qol urdı. Onıń baslaması menen Nókis rayonı “Samanbay” APJ aymaǵındaǵı 534 xojalıqtıń úy aldı qıytaq jerlerine endi suw óz waqtında hesh qanday qıyınshılıqlarsız jetip barmaqta.

Deputattıń usı máhálledegi saylawshılar menen ótkergen ushırasıwında “Qattaǵar” awılınıń turǵınları úy aldı qıytaq jerlerin suwǵarıw ushın awıl aymaǵınan ótetuǵın “Qattaǵar” kanalına ornatılǵan eski suw nasosı tez-tez buzılıp, isten shıǵıwı nátiyjesinde shańaraqlardıń úy aldı qıytaq jerlerine suw óz waqtında jetip barıwında mashqalalar payda bolıp atırǵanlıǵı sebepli, xalıq wákilinen kanalǵa jańa suw nasosın qurıp beriwge ámeliy járdem soraǵan edi.

Múrájat kórip shıǵılıp, kóp kúttirmey unamlı sheshildi. Deputat, Alisher Djumanazarov óz qáwenderligi esabınan, eski suw nasosınıń ornına az elektr energiyasın jumsaytuǵın, suw shıǵarıw quwatlılıǵı joqarı, diametri 350 mm bolǵan zamanagóy suw nasosın qosımsha barlıq úskeneleri menen birge ornatıp berdi.
Usı múnásibet penen, máhálle xalqı hám nuranıylar deputatqa óz minnetdarshılıǵın bildirgen halda Isbilermenler háreketi Ózbekstan Liberal-demokratiyalıq partiyasınıń keleshektegi jumısına hám qayırqomlıq jumıslarına tabıslar tiledi.
– ÓzLiDePten Qaraqalpaqstan Respublikası Joqarǵı Keńesine saylanǵan deputat A.Djumanazarovtıń máhálle xalqına kórsetken biyǵárez járdeminen sheksiz quwanıshlımız. Deputattıń tikkeley basshılıǵı menen, awılımızǵa zamanagóy suw nasosın qurıp berdi. Oǵan awıl xalqı atınan minnetdarshılıq bildiremiz. Insan qádiri ulıǵlanıp atırǵan elde jasap atırǵanımızdan maqtanamız,-deydi Samanbay APJ baslıǵı Niyetbay Umarov.

Qaraqalpaqstan xabar agentligi