Respublikamızdıń eń arqa-shıǵıs aymaǵı esaplanǵan Taxtakópir rayonında da 9-aprel-Qaraqalpaqstan Respublikasınıń Konstituciyası qabıl etilgeniniń 32 jıllıq sánesi saltanatlı túrde bolıp ótti.

Rayon orayındaǵı mádeniyat sarayında ótkerilgen bayram saltanatına deputatlar, rayon basshıları, aymaqta jaylasqan mákeme-kárxana, shólkem baslıqları hám keń jámiyetshilik wákilleri qatnastı.
Ilajda rayon hákimi Jambul Adilov hám basqalar shıǵıp sóylep, ilaj qatnasıwshıların bayram menen qızǵın qutlıqladı hám xalqımızdıń huqıq hám erkinliklerin támiyinlew, turmıs abadanlıǵın arttırıwda Konstituciyanıń tutqan ornı hám atqaratuǵın xızmeti tuwralı keń túrde aytıp berdi.
Bayram saltanatında kórkem óner tarawı xızmetkerleri sánege baǵıshlap tayarlaǵan koncert baǵdarlaması jıynalǵanlar názerine usınıldı.

Qaraqalpaqstan xabar agentligi