Házirgi kúnlerde Evropa Awqamınıń «Ximiyalıq, biologiyalıq, radiaciyalıq hám yadrolıq qáwipsizliktiń dala shınıǵıwları» joybarı sheńberinde mámleketimiz aymaǵında bir qatar áhmiyetli ilajlar ámelge asırılmaqta.

Usı joybardıń tiykarǵı maqseti bolsa regionda qáwipsizlikti támiyinlew hám usı tarawlarda xalıqaralıq birge islesiwdi rawajlandırıwǵa qaratılǵan.
Sanaat, radiaciya hám yadro qáwipsizligi komitetinde ótkerilgen májiliste usı haqqında sóz boldı.
Onda mámleketimiz basshısınıń 2024-jıl 24-dekabrdegi pármanı hám Prezident Adminastraciyasınıń tapsırmasına muwapıq, bul joybar sheńberinde mámleketimizde ótkeriliwi rejelestirilgen regionallıq dala shınıǵıwlarına tayarlıq kóriw boyınsha shólkemlestiriw hám qarjı máseleleri dodalandı.
Atap ótilgenindey, usı dala shınıǵıwları 2025-jıl sentyabr ayına belgilengen bolıp, onda Evropa Awqamı ekspertleriniń qatnasıwında qáwipsizlikti támiyinlew boyınsha ámeliy shınıǵıwlar hám treninglerdiń ótkeriliwi názerde tutılǵan. Sonday-aq, Bakteriologiyalıq (biologiyalıq) hám toksikalıq qollanbalardı islep shıǵıw, tayarlaw hám saqlawdı qadaǵan etiw hám olardı saplastırıw haqqındaǵı konvenciya sheńberinde Tashkent qalasında regionallıq ushırasıwdıń shólkemlestiriliwi rejelestirilgen.
Bul baslama xalıqaralıq birge islesiwdi jáne de bekkemlew, tájiriybe almasıw hám qáwipsizlik boyınsha birgeliktegi háreketlerdi kúsheytiwde úlken áhmiyetke iye.
Házirgi waqıtta Komttet qánigeleri tárepinen «Ximiyalıq qáwipsizlik haqqında»ǵı nızam joybarı islep shıǵılmaqta. Bul hújjet 2025-jıl sentyabrge shekem Ministrler Kabinetine usınıs etiliwi rejelestirilgen.
Bunnan tısqarı, «Radioaktiv shıǵındılar menen islesiw tártibi haqqında»ǵı nızam joybarı da islep shıǵılmaqta. Nızam 2025-jıl noyabrge shekem tiyisli uyımlarǵa usınıs etiliwi kútilmekte.
Bul nızamlar tarawdaǵı huqıqıy tiykarlardı bekkemlew, qáwipsizlikti támiyinlew tarawındaǵı birge islesiwdi kúsheytiw emes, al mámleketimizde bul baǵdardaǵı nızamshılıqtı jetilistiriwge de áhmiyetli úles qosadı.
Májilis juwmaǵında joybar sheńberinde ámelge asırılatuǵın jumıslar belgilep alındı.

N.Ziyodullaeva, ÓzA