Qazaqstannıń «ranking.kz» saytı Oraylıq Aziyaǵa turistler aǵımınıń ósiwi tallanǵan maqala járiyaladı. 2023-2024-jıllar kórsetkishi salıstırılǵanda Ózbekstan regionda jetekshilikti qolǵa kirgizip, turistler aǵımı eń tez ósiw pátin saqlap qalǵan.

– 2024-jıl Ózbekstanǵa barǵan sırt el turistleri sanı 20,1 procentke artıp, 8 million adamǵa jetti,-dep jazadı avtor. – Sonday-aq, regionnıń basqa ellerinde de turizm rawajlanıwı baqlanǵan.
– Milliy statistika uyımlarınıń maǵlıwmatına bola, 2024-jılı Qazaqstan, Ózbekstan, Qırǵızstan hám Tájikstanǵa rezident emes kelgenlerdiń ulıwma sanı 28,6 milliondı quraǵan. Bul baǵdardaǵı ósiw 2023-jılǵa qaraǵanda 11 procentti quradı.
Ózbekstan turizminiń rawajlanıwı, turistler aǵımınıń unamlı ósiw páti turistlerge kórsetilip atırǵan xızmet túri hám sapası kóterilgeni menen baylanıslı ekenligi atap ótilgen. Ózbekstan Respublikası Milliy statistika komitetiniń maǵlıwmatına bola, ótken jılı yanvar-dekabr aylarında usı tarawda finanslıq kórsetkish 10.6, 2023-jıl 13.5, 2022-jıl 22.3 procentke artqan.

S.Rahimov,
ÓzA