Respublikamızdıń barlıq aymaqlarında bolǵanı sıyaqlı, 9-aprel-Qaraqalpaqstan Respublikası Konstituciyası kúni Shımbay rayonında da saltanatlı jaǵdayda belgilenip ótildi.

Ilajǵa deputatlar, rayon basshıları, aymaq belsendileri, jaslar hám ǵalaba xabar qurallarınıń wákilleri qatnastı.
Ótkerilgen ilajda Shımbay rayonı hákiminiń orınbasarı Raxat Jumamuratov aymaq xalqın Qaraqalpaqstan Respublikası Konstituciyasınıń 32 jıllıq bayramı menen qızǵın qutlıqlap, Konstituciyanıń xalqımız turmısında tutqan ornı hám áhmiyeti haqqında keń túrde aytıp ótti.
-Respublikamız Konstituciyasınıń 62-statyasında «Ata-analar perzentlerin erjetkenge shekem saqlawǵa hám tárbiyalawǵa minnetli. Mámleket hám jámiyet jetim balalardıń hám ata-analardıń qáwenderliginen ayırılǵan balalardı saqlaw, tárbiyalaw hám olardıń bilim alıwın támiyinleydi, balalarǵa arnalǵan qayırqomlıq islerin xoshametleydi,-dep kórsetilgen deydi rayonlıq Keńes deputatı Janar Alieva.-Bul álbette, bas nızamımızdıń xalıqaralıq nızamshılıq normalarına tolıq sáykes keletuǵınlıǵın ańlatadı. Pursattan paydalanıp, barlıq xalqımızdı búgingi qutlı sáne menen qızǵın qutlıqlayman.
Bayram ilajı rayonlıq mádeniyat bólimi tárepinen tayarlanǵan koncert baǵdarlaması menen kewilli dawam etti.

Adilbay Orazov,
Qaraqalpaqstan xabar agentligi sholıwshısı