Múnásibet

Prezidentimizdiń usı jıldıń 28-martındaǵı qararına muwapıq 4-6-aprel kúnleri birinshi Aral mádeniyat sammiti Samarqand klimat forumı menen úylesimli túrde Samarqand hám Nókis qalalarında joqarı dárejede ótkeriledi.

Aral mádeniyat sammiti Aral teńizi regionındaǵı ekologiya, mádeniyat hám turaqlı rawajlanıw boyınsha áhmiyetli máselelerdi dodalaw maqsetinde kórkem óner, ilim hám keń jámiyetshilik wákillerin birlestiretuǵın biybaha ánjuman bolıp esaplanadı. Sammit jergilikli hám sırt elli qánigeler, dóretiwshilerdi bir jerge jıynap, olarǵa ideyalar almasıw, birge islesiw strategiyaların islep shıǵıw hám innovaciyalıq joybarlardı usınıw imkaniyatın jaratadı.
Bul ilaj Aralboyı regionın kórkem óner, mádeniyat, dizayn hám ilim arqalı sociallıq hám ekologiyalıq jaqtan ózgertiwge qaratılǵan jańa joybar bolıp esaplanadı. Sonday-aq, sammit Aral teńizi ekosistemasın qásterlep saqlaw, jergilikli mádeniyattı xalıqaralıq maydanda ǵalaba en jaydırıw boyınsha jańa strategiyalardı qáliplestiriwge xızmet etedi.
Sammittiń uzaq múddetli nátiyjesi mámleketler arasındaǵı mádeniy baylanıslardı bekkemlew, turaqlı rawajlanıw joybarlarına investiciya tartıw hám jergilikli izertlewshiler ushın jańa imkaniyatlar jaratıwdan ibarat. Keleshekte qatnasıwshılar geografiyasın keńeytiw, xalıqaralıq shólkemler menen birge islesiwdi tereńlestiriw hám regiondaǵı ekologiyalıq jaǵdaydı jaqsılaw ushın innovaciyalıq sheshimlerdi engiziw rejelestirilgen. Aral mádeniyat sammiti tek ǵana dodalawlar maydanı emes, al Aralboyı miyrasın qásterlep saqlaw hám keleshekte rawajlandırıwǵa qaratılǵan haqıyqıy háreketler maydanına aylanadı.
Ózbekstan 2023-jıl 22-24-mart kúnleri BMShtıń Nyu-Yorkte bolıp ótken suw resursları konferenciyasında Aral mádeniyat sammiti joybarın ámelge asırıw baslamasın alǵa qoyǵan edi. Endi Prezidentimizdiń qararına tiykarlanıp, sammit hár 18 ayda – báhár yamasa gúzde ótkeriledi. Sammit Qaraqalpaqstannıń turaqlı rawajlanıwına úles qosatuǵın ekologiyalıq, sociallıq hám mádeniy sheshimlerdi izlew ushın jergilikli hám xalıqaralıq belsendiler, xudojnikler hám ilimpazlardı birlestiredi.
Qararǵa muwapıq, ekologiyalıq mashqalalardı sheshiw boyınsha Aralboyı regionı hám dúnyanıń basqa da regionlarında júzege kelgen ekologiyalıq mashqalalardı dodalaw, aqılǵa uǵras sheshimlerdi usınıw ushın global platforma jaratıw hám usı mashqalalardı sheshiwde ilimler arasındaǵı qatnasıqlardı rawajlandırıw názerde tutılǵan. Sonday-aq, turaqlı qararlar hám strategiyalardı islep shıǵıwǵa qaratılǵan bilimlendiriw baǵdarlaması tiykarında Aral mektebin jaratıw menen birge, jetekshi jergilikli hám sırt elli qánigeler hám shólkemler menen birgelikte Aralboyı regionında suw hám topıraq izertlewleri ótkeriledi.
Atap aytqanda, Aral mádeniyat sammiti regionnıń ekologiyalıq hám mádeniy mashqalalarına itibardı tartıwda áhmiyetli rol atqaradı. Xalıqaralıq birge islesiwdi rawajlandırıwǵa úles qosadı, dóretiwshilerdi sheshimler tabıwǵa ilhamlandıradı, Aral teńizin hám jergilikli jámiyetshiliklerdiń mádeniy miyrasın qásterlep saqlawdan mápdar bolǵan adamlardı birlestiredi.

Olimjon DÚYSENBAEV,
filologiya ilimleriniń kandidatı, docent
Qaraqalpaqstan xabar agentligi