2025-jıl 1-aprelde «Janar may-energiya resurslarınan nızamsız paydalanıw hám biykarǵa jumısalıwınıń aldın alıw hám energiya nátiyjeliligin arttırıw boyınsha ilajlardı jetilistiriw haqqında»ǵı Ózbekstan Respublikası Prezidentiniń qararı qabıl etilgen edi. Usı qarardıń orınlanıwın támiyinlew boyınsha Beruniy rayonı prokurorı M.Atadjanovtıń basshılıǵında májilis bolıp ótti.

– Taraw wákilleriniń qatnasıwında sın kózqarasta ótkerilgen bul májiliste 2025-jıl dawamında elektr energiyası hám tábiyǵıy gazden aqılǵa uǵras paydalanıw jáne únemlew nátiyjeliligine erisiw, bul baǵdarda energiyanı únemleytuǵın úskenelerden paydalanıw, alternativ energiyaǵa tolıq ótiw zárúr ekenligi atap ótildi, – deydi rayon hákimligi Málimleme xızmeti bólimi baslıǵı bergen maǵlıwmatında.
Sonday-aq, elektr támiynatı kárxanası tárepinen bıyılǵı joybarlar tanıstırıldı. Qánigeler tárepinen kerekli usınıslar berildi.
Tarawda korrupciya jaǵdaylarınıń aldın alıw hám saplastırıw itibar orayındaǵı máselelerden biri boldı. Sonıń menen bir qatarda, elektr energiyası hám tábiyǵıy gazge nızamsız tártipte jalǵanǵan tutınıwshılarǵa nızamlı tártipte shara kóriw máselelerine de toqtap ótti.

Qaraqalpaqstan xabar agentligi