Ózbekstan paytaxtında Parlamentleraralıq awqamnıń 150-yubiley assambleyası bolıp ótpekte. Assambleya sheńberinde Oliy Majlis Senatı Baslıǵı Tanzila Norboeva Birlesken Arab Ámirlikleri Federal Milliy keńesiniń Qorǵanıw, ishki hám sırtqı isler komitetiniń baslıǵı Áli Rashid Nuamiy menen ushırasıw ótkerdi.

Ózbekstan hám BAÁ arasındaǵı parlamentleraralıq birge islesiwdi jáne de rawajlandırıw máseleleri, sonday-aq, túrli tarawlarda eki tárepleme qatnasıqlardı tereńlestiriw perspektivaları kórip shıǵıldı.
Tárepler jaqında ámelge asırılǵan joqarı dárejedegi saparlardıń juwmaqların, sonıń ishinde, 2025-jıl yanvar ayında qol qoyılǵan Strategiyalıq sheriklik haqqındaǵı kelisimdi hám erisilgen kelisimlerdi ámelge asırıw boyınsha keleshektegi qádemlerdi dodaladı.
Sol kózqarastan eki mámleket arasında qol qoyılǵan «jol kartaları» hám Memorandum sheńberindegi kelisim hám joybarlardıń orınlanıwı ústinen parlamentlik qadaǵalawdı kúsheytiw usınıs etildi. Sonday-aq, sistemalı hám turaqlı eki mámlekettiń birge islesiwi ushın tiykar bolatuǵın tiyisli komitetler hám «doslıq toparları» jumısın kúsheytiw de názerde tutılmaqta.
Sonday-aq, Mongoliya Ullı Mámleket Hurali Baslıǵınıń orınbasarı Xurelbaator Bulgantuya menen bolıp ótken sóylesiw waqtında parlamentleraralıq doslıq toparınıń jumısın jedellestiriw hám 2025-2026-jıllarǵa mólsherlengen parlamentleraralıq birge islesiw boyınsha «jol karta»sın islep shıǵıw arqalı Ózbekstan hám Mongoliya parlamentleri arasındaǵı birge islesiwdi bekkemlew máselelerine ayrıqsha itibar qaratıldı.
Ushırasıwda keleshektegi rejeler, sonıń ishinde, parlamentler basshılarınıń óz-ara saparların shólkemlestiriw hám xalıqaralıq parlament forumlarında qatnasıw máseleleri dodalandı. Bul eki mámleketke ulıwma máplerin jedel alǵa qoyıw imkaniyatın beredi.
Sonıń menen birge, Belgiya Patshalıǵı Senatı Baslıǵı Vinsent Blondel menen sáwbetlesiw waqtında parlamentleraralıq birge islesiwdiń áhmiyetli máseleleri hám eki mámleket arasındaǵı birge islesiwdi jáne de keńeytiw perspektivaları dodalandı.
Tárepler perspektivadaǵı rejeler, sonıń ishinde, «Ózbekstan – Belgiya» doslıq toparı májilisin shólkemlestiriw máselelerin dodaladı.
Ushırasıw juwmaǵında eki tárepleme qatnasıqlardı rawajlandırıwdıń áhmiyetli máselelerine ayrıqsha itibar qaratqan halda parlamentleraralıq shólkemler sheńberinde tıǵız birge islesiwdi dawam ettiriw zárúr ekenligi atap ótildi.

Qaraqalpaqstan xabar agentligi