2025-2026-jılǵı ısıtıw máwsiminde járdemge mútáj qatlamdı qollap-quwatlaw maqsetinde noyabr ayında ayırım kategoriyadaǵı shańaraqlarǵa 1 million sumnan bir mártelik materiallıq járdem beriledi. Bul haqqında Ádillik ministrligi xabar berdi.

Oǵan bola, járdem pulları sociallıq járdem reestrine kirgizilgen hám «máhálle jetiligi» juwmaǵı tiykarında járdemge mútáj dep tabılǵan shańaraqlarǵa ajıratıladı. Onda baǵıwshısın joyıtqanlar hám mayıp aǵzası bar shańaraqlar, mayıp perzentti tárbiyalap atırǵanlar yamasa uzaq emleniwge mútájler de názerde tutılǵan.
Bunnan tısqarı, jalǵız kekseler, 3 hám onnan artıq shańaraq jasaytuǵın xojalıqlar, gaz támiynatı bolmaǵan hám oraylastırılǵan tártipte ısıtılmaytuǵın kóp qabatlı turaq jaylarda jasawshılar da materiallıq járdem alıwı múmkin.
Qosımsha dúziletuǵın dizimdegi shańaraqlar sanı reestrine kirgizilgen shańaraqlar sanınıń 40 procentinen aspawı kerek.

Qaraqalpaqstan xabar agentligi