Ózbekstan Respublikası Prezidenti Shavkat Mirziyoev 7-aprel kúni Parlamentleraralıq awqam Assambleyasınıń 150-sessiyası sheńberinde Ázerbayjan Respublikası Milliy Majlisi Baslıǵı Sohiba Gafarovanı qabılladı.

Ushırasıw aldında joqarı mártebeli miyman Ózbekstan jetekshisine Ázerbayjan Prezidenti Ilham Álievtiń sálemi hám eń jaqsı tileklerin jetkerdi.
Ózbekstan menen Ázerbayjan arasındaǵı doslıq, strategiyalıq sheriklik hám awqamlaslıq qatnasıqların jáne de keńeytiw hám bekkemlewdiń áhmiyetli máseleleri kórip shıǵıldı.
Ekonomikalıq birge islesiw jılı sheńberinde birgelikte nátiyjeli jumıslar ámelge asırılıp atırǵanı qanaatlanıwshılıq penen atap ótildi. Tovar almasıw kólemi artpaqta, ekonomikanıń hár qıylı tarmaqlarında kooperaciyalıq joybarlar jedel túrge engen. Mádeniy-gumanitarlıq ilajlar turaqlı ótkerip kelinbekte.
Erisilgen kelisimlerdiń orınlanıwın qadaǵalaw hám bolajaq joqarı dárejedegi sammitler ushın jańa usınıslar islep shıǵıw maqsetinde parlamentler arasında tıǵız ámeliy birge islesiwdi hám jedel almasıwlardı dawam ettiriw áhmiyetli ekeni atap ótildi.

ÓzA