Ózbekstan Birlesken Milletler Shólkeminiń Evropa ekonomikalıq komissiyası (UNECE) tárepinen shólkemlestirilgen Turaqlı rawajlanıw boyınsha regionallıq forumına birinshi márte birgelikte basshılıq etti.

Shveycariyanıń Jeneva qalasında bolıp ótken bul abıraylı ánjumanda Ózbekstan Respublikası ekonomika hám qarjı ministriniń orınbasarı Umid Obidxwjaev mámleketimiz atınan járdemshi basshısı sıpatında qatnasıp, turaqlı rawajlanıw tarawındaǵı áhmiyetli máseleler boyınsha dodalawlarǵa jetekshilik etti. Ol óz sózinde regionallıq tájiriybe hám kóz qaraslardı global kólemde usınıwǵa ayrıqsha itibar berdi.
Bul baslama Ózbekstannıń xalıqaralıq masshtabtaǵı abırayı artıp, sonıń ishinde, Turaqlı rawajlanıw maqsetlerin (SDG) ámelge asırıwdaǵı bekkem poziciyasınan dárek beredi. Bul birgeliktegi basshılıq Ózbekstan ushın tek ǵana siyasiy hám ekonomikalıq emes, al ekologiyalıq hám sociallıq turaqlılıqtı támiyinlew jolında da áhmiyetli qádem boldı.
Forum sheńberinde mámleketler arasında birge islesiwdi bekkemlew, tájiriybe almasıw hám jańa ideyalardı alǵa qoyıw baǵdarında bir qatar ámeliy kelisimler hám sóylesiwler ámelge asırıldı.
Ózbekstan bul processti jedel dawam ettiredi. Mámleketimiz global kólemde turaqlı rawajlanıwǵa qaray umtılıwda sóylesiw hám ámeliy birge islesiwdi hár tárepleme qollap-quwatlaydı.

Nasiba ZIYoDULLAEVA,
ÓzAnıń xabarshısı