Parlamentleraralıq Awqamnıń 150-yubiley Assambleyası sheńberinde mámleketimizde bolıp turǵan Qatar Mámleketi Shwro Keńesiniń baslıǵı Hasan bin Abdulloh al-Ǵonim basshılıǵındaǵı delegaciya Oliy Majlis Nızamshılıq palatasınıń Spikeri Nuriddin Ismoilov penen ushırastı.

Ushırasıwda mámleketlerimiz basshılarınıń siyasiy erk-ıqrarı, háreketleri hám óz-ara doslıq qatnasıqları nátiyjesinde eki mámleket arasındaǵı birge islesiw jedel siyasiy sóylesiwler óz-ara paydalı ekonomikalıq baylanıslardı jańa basqıshqa alıp shıǵıp atırǵanı joqarı bahalandı.
Atap aytqanda, Ózbekstan Respublikası Prezidenti Shavkat Mirziyoevtiń 2023-jıl oktyabr ayında Qatarǵa ámelge asırǵan mámleketlik saparı hám Qatar Mámleketiniń Ámiri Sheyx Tamim bin Hamad Ol Soniydiń 2023-jılı eki márte Ózbekstanǵa islegen saparı mámleketler arasındaǵı kóp táreplemeli birge islesiwdi jáne de keńeytiw, mámleketlerimiz arasındaǵı strategiyalıq sheriklikti bekkemlewde áhmiyetli faktor bolıp atırǵanı ayrıqsha atap ótildi.
Sóylesiw dawamında delegaciya aǵzalarına jańa basılımdaǵı Konstituciya normaların júzege shıǵarıw baǵdarındaǵı háreketler hám Nızamshılıq palatası jumısınıń tiykarǵı baǵdarları haqqında maǵlıwmat berildi.
Óz gezeginde, Qatar Mámleketi Shwro Keńesi baslıǵı eki tárepleme baylanıslardı rawajlandırıwda áhmiyetli faktor bolǵan parlamentleraralıq birge islesiwdi jáne de keńeytiw hám bekkemlew, usı baǵdardaǵı sóylesiwlerdi kóbeytiw hár tárepleme paydalı ekenin atap ótti.
Sonday-aq, Ózbekstan, Tájikstan hám Qırǵızstan mámleketlik shegaralarınıń tutas noqatı haqqındaǵı táriyxıy shártnamaǵa qol qoyılǵanı, Samarqandta bolıp ótip atırǵan «Oraylıq Aziya-Evropa Awqamı» birinshi sammiti joqarı bahalanıp, qollap-quwatlandı.
Qızǵın ruwxta ótken ushırasıwda parlamentleraralıq baylanıslardı jańa basqıshqa kóteriw, parlamentleraralıq doslıq toparlarınıń jumısın jáne de janlandırıw zárúr ekenligi atap ótildi.

Muhtarama KOMILOVA,
ÓzAnıń xabarshısı