Ózbekstan Respublikası Prezidentiniń qararı

Mámleketimizde janılǵı –energetika resursları bahalarınıń qáliplesiwin basqıshpa-basqısh bazar principlerine ótkeriw dáwirinde xalıqtı mámleket tárepinen qollap-quwatlaw maqsetinde qarar etemen:
I. Mámleket tárepinen qollap-quwatlaw ilajları
1. 2025-jıl 1-maydan 2027-jıl 1-aperlge shekem «Sociallıq qorǵawdıń birden-bir reestri» málimleme sisteması arqalı balalar napaqası hám materiallıq járdem alatuǵın hám Kámbaǵal shańaraqlar reestrine (keyingi orınlarda – Reestrler) kirgizilgen, sonday-aq, Reestrlerge kirgizilmegen, biraq materiallıq jaǵdayı boyınsha kem támiyinlengen shańaraqlardıń normalarına durıs keletuǵın, shańaraqtaǵı jan basına dáramatı minimal tutınıw qárejetleriniń 1,5 esesinen artpaytuǵın shańaraqlarǵa:
(a) elektr energiyasınan paydalanıwı boyınsha – ayına bazalıq normiadan 150 kVt saatqa shekem;
(b) tábiyǵıy gazden paydalanıwı boyınsha – ısıtıw máwsiminde ayına bazalıq normadan 250 kub metrge shekem, basqa dáwirlerde ayına bazalıq normadan 150 kub metrden aslam paydalanılǵan bólegi ushın bazalıq norma sheńberindegi hám bazalıq normadan artqan bahalar arasındaǵı ayırmashılıq kompensaciyalanıp beriletuǵını belgilensin.
2. 2025-2026-jılǵı ısıtıw máwsiminde xalıqtıń mútáj qatlamın qosımsha materiallıq jaqtan qollap-quwatlaw maqsetinde bıyılǵı jıldıń noyabr ayında tómendegi shańaraqlarǵa 1 million sumnan bir mártelik materiallıq járdem ajıratılsın:
(a) Reestrlerge kirgizilgen shańaraqlarǵa;
(b) «máhálle jetiligi» tárepinen qosımsha dizim qáliplestiriliwinde birinshi gezekte, baǵıwshısın joyıtqan shańaraqlar, aǵzaları I hám II topar mayıplıǵı bolǵan shaxslardan ibarat shańaraqlar, mayıplıǵı bolǵan balalardı baǵıp atırǵan shańaraqlar, uzaq múddetli emleniwdi talap etetuǵın kesellikler menen awırǵan shaxslar jasaytuǵın shańaraqlar, basqalardıń kútimine mútáj bolǵan jalǵız jasaytuǵın shaxslar hám jalǵız jasaytuǵın kekseler hám mayıplıǵı bolǵan shaxslar, úsh hám onnan aslam shańaraq jasaytuǵın jaylarda hám gaz támiynatı bolmaǵan hám oraylastırılǵan tártipte ısıtılmaytuǵın kóp qabatlı jaylarda jasaytuǵın shańaraqlar inabatqa alınadı;
(g) qosımsha túrde qáliplestiriletuǵın dizimdegi shańaraqlardıń sanı Reestrlerge kirgizilgen shańaraqlar sanınıń 40 procentinen artpawı zárúr.
3. Qaraqalpaqstan Respublikası Ministrler Keńesi, wálayatlar hám Tashkent qalasınıń hákimlikleri Sociallıq qorǵaw milliy agentligi hám Ózbekstan máhálleleri associaciyası menen birgelikte 2025-jıl 1-oktyabrge shekem «máhálle jetilikleri» tárepinen respublika boyınsha hár bir máhálle kesiminde qosımsha dizimler qáliplestiriliwin támiyinlesin. Onda hákimlikler tiyisli rayon (qala) boyınsha Reestrlerge kirgizilgen shańaraqlar sanınıń 40 procentinen artpaǵan halda mútáj shańaraqlardıń sanına máhálleler kesiminde ózgerisler kirgiziliwi múmkin.
II. Qarjılay resurslar
4. Ekonomika hám qarjı ministrligi usı qarar menen belgilenip atırǵan materiallıq járdem hám kompensaciya tólemlerin hám usı tólemler boyınsha AK «Xalıq banki» xızmetine haqı tólew qárejetlerin qarjılandırıw ushın Ózbekstan Respublikası respublikalıq byudjet qarjıları esabınan Sociallıq qorǵaw milliy agentligine zárúr qarjılardı ajıratsın.
III. Qarardıń orınlanıwın shólkemlestiriw, támiyinlew hám qadaǵalaw
5. Ministrler Kabineti bir hápte múddette usı qararǵa muwapıq qosımsha dizimlerdi qáliplestiriw hám kompensaciya hám materiallıq járdem tólemlerin tólew tártibin tastıyıqlasın. Onda rayon (qala) hákimlikleri, Ózbekstan máhálleleri associaciyasınıń rayon (qala)lıq bólimleri, «Insan» sociallıq xızmetler orayları hám «máhálle jetiligi»niń wazıypaları anıq belgilensin.
6. Sociallıq qorǵaw milliy agentligi:
(a) elektr energiyası hám tábiyǵıy gaz boyınsha kompensaciya tólemleri óz waqtında tóleniwin;
(b) AK «Xalıq banki» menen birgelikte usı jıl noyabr ayında bir mártelik materiallıq járdem tóleniwin;
(v) Ekonomika hám qarjı ministrligi, Ózbekstan Milliy málimleme agentligi, Ózbekstan Milliy teleradiokompaniyası hám Málimleme hám ǵalaba kommunikaciyalar agentligi menen birgelikte usı qarardıń maqseti, wazıypaları hám onnan kútilip atırǵan nátiyjeler ǵalaba xabar quralları, internet hám sociallıq tarmaqlarda keńnen sáwlelendiriliwin shólkemlestirsin.
7. Ministrler Kabineti janındaǵı Elektr energiyası, neft ónimleri hám gazden paydalanıwdı qadaǵalaw inspekciyası, Energetika ministrligi bir hápte múddette xalıq tárepinen elektr energiyası hám tábiyǵıy gazden nátiyjeli paydalanıwdı jolǵa qoyıw arqalı energiya resursların jumsawǵa qaratılǵan mánzilli ilajlardıń rejesin islep shıǵıp, tastıyıqlaw ushın Ministrler Kabinetine kirgizsin.
8. Ózbekstan máhálleleri associaciyası (Q.Quranbaev), Sociallıq qorǵaw milliy agentligi (M.Olloyorov)niń:
(a) kámbaǵal shańaraqlar hám mútáj xalıqtı qosımsha qollap-quwatlaw ilajları menen tolıq qamtıp alıw maqsetinde máhállelerde mánzilli úgit-násiyat jumısların kúsheytiw;
(b) xalıqqa materiallıq járdem ajıratıwda máhálle basshıları tárepinen ashıq-aydınlıq hám ádillik támiyinleniwin kepillewi hám jeke juwapkershiligi belgilensin.
9. Qaraqalpaqstan Respublikası Ministrler Keńesi Baslıǵı, wálayatlar hám Tashkent qalasınıń hákimleri bir mártelik materiallıq járdemdi tólew boyınsha qosımsha dizimlerdiń durıs qáliplestiriliwine hám tólemlerdiń óz waqtında tólewine jeke juwapker etip belgilensin.
10. Bas prokuratura (I.Adxamov) usı qararǵa muwapıq ajıratılatuǵın qarjılardıń maqsetli jumsalıwı ústinen turaqlı qadaǵalaw ornatsın.
11. Usı qarardıń orınlanıwın nátiyjeli shólkemlestiriwge juwapker etip Bas ministrdiń orınbasarı J.A.Qwchqorov hám Ózbekstan Respublikası Prezidentiniń keńesgóyi – Sociallıq qorǵaw milliy agentligi direktorı M.P.Olloyorov belgilensin.
12. Usı qarardıń orınlanıwın qadaǵalaw hám orınlaw ushın juwapker shólkemlerdiń jumısın muwapıqlastırıw Ózbekstan Respublikası Bas minisri A.N.Aripovqa júklensin.

Ózbekstan Respublikası
Prezidenti Sh.MIRZIYoEV
Tashkent qalası,
2025-jıl 2-aprel