Húrmetli delegaciya aǵzaları!
Húrmetli xanımlar hám mırzalar!
Sizlerdi «Oraylıq Aziya – Evropa Awqamı» birinshi sammitinde qutlıqlawdan oǵada quwanıshlıman.
Evropa Keńesi Prezidenti Ullı mártebeli Mırza Antoniu Koshta, Evropa Komissiyası Prezidenti Ursula fon der Lyayen Xanımlarǵa, meniń barlıq kásipleslerim – region mámleketleri jetekshilerine sammitti áyne usı jerde, áyyemgi Samarqand qalasında ótkeriw boyınsha baslamamızdı qollap-quwatlaǵanı ushın minnetdarshılıq bildiremen.
Kóp ásirler dawamında Ullı Jipek jolınıń tiykarǵı jollarınıń kesilispesinde jaylasqan bul dańqlı qala civilizaciyalar qarım-qatnası jáne Shıǵıs hám Batıs arasında diplomatiya, sawda hám mádeniy almasıwlardıń áhmiyetli orayı bolǵan.
Bul haqqında kóplegen tariyxıy dáliller bar. Máselen, Mawarenahr húkimdari Ámir Temur bunnan altı ásirden aslam waqıt aldın áne, usı diyarda turıp erkin hám qáwipsiz sawdanı támiyinlew maqsetinde Evropa húkimdarları menen jedel sóylesiwlerdi jolǵa qoyǵan.
Biziń Muhammad Xorezmiy, Ahmed Ferǵaniy, Ábiw Rayxan Beruniy, Ibn Sina, Mırza Ulıǵbek hám basqa da ullı ulama hám oyshıllarımız jáhán, sonıń ishinde, Evropa ilim hám filosofiyasınıń rawajlanıwına sheksiz úles qosqanın, álbette, atap ótpey óte almaymız.
Biziń tereń tariyxıy tamırlarǵa iye bolǵan qatnasıqlarımız házirgi zaman sharayatında jedel rawajlanıp hám bekkemlenip atırǵanın búgin men qanaatlanıwshılıq penen atap ótiwdi qáler edim.
Usı kúnlerde bolıp ótken ashıq, konstruktivlik hám nátiyjeli ushırasıwlar ellerimiz hám regionlarımızdıń mápleri jolında sheriklik hám ámeliy birge islesiwdi tereńlestiriwge bolǵan siyasiy erk-ıqrarımızdı jáne bir márte kórsetti.
Evropa Awqamı tiykarǵı institutlarınıń basshılarına óz-ara túsinisiw hám Oraylıq Aziyada integraciya hám turaqlı rawajlanıw processlerin hár tárepleme qollap-quwatlap atırǵanı ushın jáne bir márte minnetdarshılıq bildiremen.
Men bul zalda dástúriy sheriklerimiz – Evropa tikleniw hám rawajlanıw banki prezidenti Reno-Baso hám Evropa investiciya banki wákillerin kórip turǵanımnan da quwanıshlıman. Bul qarjı institutlarınıń «Keleshekke investiciyalar» súreni astında ótip atırǵan búgingi sammitimizdiń wazıypa hám qararların alǵa qoyıwdaǵı roli oǵada áhmiyetli, dep esaplaymız.
Usı jerde bunnan segiz jıl burın Ózbekstan menen Evropa tikleniw hám rawajlanıw banki qatnasıqları toqtap turǵanın atap ótiwdi qáler edim. Búgin bolsa biz banktiń eń iri beneficiarlarınan birimiz.
Húrmetli kásiplesler!
Ashxabadtaǵı ushırasıwlardıń juwmaqları boyınsha biziń ministrler hám ekspertlerimiz kóp tárepleme birge islesiwdiń barlıq tiykarǵı baǵdarların qamtıp alǵan sammittiń kún tártibin tayarladı.
Sonday-aq, biz búgin Oraylıq Aziya duslasıp atırǵan zamanagóy ekologiyalıq qáwip-qáterlerge baǵıshlanǵan Samarqand klimat forumı jalpı sessiyasına da birgelikte qatnasamız.
Húrmetli delegaciyamız basshıları!
Biziń ushırasıwımız jedel hám aldın ala boljawǵa bolmaytuǵın global processler sharayatında ótpekte.
Biz geosiyasiy qarama-qarsılıqlar, qáwipsizlik mashqalaları, iri regionallıq keskinliklerdiń kúsheyiwiniń gúwası bolmaqtamız.
Bizge belgili, hesh bir region keń xalıqaralıq sherikliksiz bunshelli qıyın máselelerdi erkin sheshe almaydı.
Usı múnásibet penen Oraylıq Aziya hám Evropa Awqamı dástúriy sherikler bolıp, óz-ara tıǵız birge islesiw ushın talap tek ǵana artıp atırǵanın atap ótiwdi qáler edim. Biz de Evropa tárepi sıyaqlı xalıqaralıq huqıq principlerine hám normalarına sadıqlıǵımızdı bildiremiz.
Ukraina átirapındaǵı jaǵdaydı tınısh jol menen sheshiw boyınsha sóylesiwler processleri baslanǵanlıǵın tolıq qollap-quwatlaymız. Aldında oǵada quramalı hám sheshimi ańsat bolmaǵan máseleler turǵanın túsinemiz.
Biraq diplomatiyalıq háreketler hám siyasiy qararlar qabıl etiwden basqa da alternativ joldı biz kórmey atırmız.
Húrmetli kásiplesler!
Ulıwma siyasiy erk-ıqrarımız sebepli turaqlı hám izge qaytpaytuǵın túrge engen Oraylıq Aziyada tereń transformaciya processleri kóp tárepleme birge islesiwimizdi rawajlandırıwǵa xızmet etpekte.
Region mámleketleri arasında isenim hám jaqın qońsıshılıq bekkemlenbekte, keń kólemli birge islesiw hám kooperaciyalıq baylanıslar keńeymekte. Bunnan jeti-segiz jıl burın buǵan hátteki sharayat ta joq edi. Ayırım mámleketler arasındaǵı shegaralar jabıq edi. Ya sawda, ya tranzit, ya biznes, hesh qanday gumanitarlıq almasıwlar joq edi. Qatnasıqlar solay muzlatıp qoyılǵan edi. Sol waqıtta hesh kim jaqın keleshekte biz Evropa jetekshileri menen sóylesiwlerde regionımızdı birgelikte kórsetiwimizdi kóz aldına da keltire almas edi.
Oraylıq Aziyanıń ashıq-aydınlıǵı hám barlıq sherikler menen óz-ara paydalı birge islesiwge tayar ekeni regionda qáwipsizlik hám abadanlıqtı támiyinlewdiń eń áhmiyetli shártine aylandı.
Usı jıl sentyabr ayında biz Tashkentte regiondaǵı mámleket basshılarınıń jetinshi Másláhát ushırasıwın ótkeremiz hám onıń sheńberinde ulıwma kún tártibindegi barlıq áhmiyetli wazıypalardı ashıq hám konstruktiv sheshemiz.
Búgingi sammitimiz qarsańında tariyxıy waqıyalar bolıp ótkenin ayrıqsha atap ótiwdi qáler edim. Bul jerde sóz Qırǵızstan hám Tájikstan arasında mámleketlik shegaralar máselesi tolıq sheshilgeni hám delimitaciyalaw boyınsha kelisimlerge qol qoyılǵanı haqqında bolmaqta.
Jáne bir márte húrmetli kásipleslerim Emomali Sharipovich Rahman hám Sadir Nurxodjaevich Japarovtı shın júrekten qutlıqlayman.
Biz birgelikte regionda iri investiciyalıq hám infrastrukturalıq joybarlardı qollap-quwatlaw ushın birliktegi investiciyalıq joybarlar hám kompaniyalar jumıs alıp barmaqta. Regionda ishki sawda kólemi artıp barmaqta. Olardı xoshametlew ushın shegara aldı sawda zonaları jaratılmaqta. Bulardıń bári ellerimiz hám pútkil regionımızdıń turaqlı rawajlanıwına imkaniyat jaratqanın atap ótiwdi qáler edim.
Evropa tikleniw hám rawajlanıw banki ekspertleriniń esap-sanaqlarına bola, regionallıq jalpı ishki ónimniń ósimi bıyıl altı procentke shekem jetedi hám bul basqa regionlardaǵı ortasha kórsetkishten sezilerdi dárejede joqarı bolıp tabıladı. Sonıń ishinde, Ózbekstanda sanaatlastırıw, infrastrukturalarǵa investiciyalar kirgiziw, ekonomikanı liberallastırıw hám biznesti qollap-quwatlawdıń esabınan turaqlı ekonomikalıq ósim támiyinlenbekte.
Ulıwma regionallıq ózine tánlikti qáliplestiriw, sonday-aq, mádeniy-gumanitarlıq hám bilimlendiriw boyınsha almasıwlardı qollap-quwatlawǵa qaratılǵan birgeliktegi jumıslarımızdı ayrıqsha atap aytpaqshıman.
Biz mámleketlerimizde jetekshi milliy oqıw mákemeleriniń filialların ashıp atırmız. Sırt elli turistler ushın birden-bir Oraylıq Aziya vizası joybarın alǵa qoyıp atırmız.
Húrmetli delegaciya basshıları!
Biziń dáslepki sammitimiz Qazaqstan hám Qırǵızstanda tabıslı ótken Oraylıq Aziya hám Evropa Awqamı jetekshileriniń eki ushırasıwınıń logikalıq dawamı bolıp tabıladı. Bul sóylesiwler hár eki táreptiń máplerin túsiniw hám sherikliktiń ulıwma baǵdarların belgilep alıwǵa paydalı boldı. Keyingi jıllarda Evropa Awqamı menen óz-ara birge islesiw sezilerli jedelleskeni baqlanıp atırǵanın atap ótpekshimen.
Keyingi jeti jılda Oraylıq Aziya mámleketleriniń Evropa Awqamı menen óz-ara tovar aylanısınıń kólemi bir neshe márte ósip, 54 milliard evroǵa jetti. Birge islesiwdiń nátiyjeli platformaları iske qosıldı. Barlıq áhmiyetli baǵdarlarda ministrlerdiń qatnasıwında májilisler, forumlar, sammitler hám konferenciyalar turaqlı ótkerilip kelinbekte.
Sonıń menen birge, bul ushırasıw kóp tárepleme qatnasıqlarımızdıń rawajlanıwında jańa basqıshtıń ózine tán baslanıw noqatı bolıwı kerek, dep esaplayman.
Usı múnásibet penen, orta hám uzaq múddetli keleshekte birgeliktegi islerimizdiń biz ushın áhmiyetli baǵdarların kórsetip ótiwdi qáler edim.
Birinshi. Bul – siyasiy sóylesiwlerdi bekkemlew jolındaǵı háreketler hám investiciyalar, kóp tárepleme birge islesiwdiń huqıqıy hám institutcionallıq tiykarları.
Sammittiń juwmaqları boyınsha Oraylıq Aziya hám Evropa Awqamı arasında strategiyalıq sheriklik ornatıw haqqındaǵı tariyxıy qarar qabıl etiledi. Qabıl etiletuǵın hújjettiń qaǵıydaların ámelge asırıwǵa qaratılǵan kompleksli ilajlardı birgelikte islep shıǵıw hám qabıl etiw zárúr, dep esaplaymız.
Biziń strategiyalıq sherikligimiz anıq qararlar, joybar hám baǵdarlamalar menen bayıtılıwı kerek ekenine bekkem isenemen. Usı múnásibet penen, biziń eki regionımız arasında sheriklik hám birge islesiw boyınsha tolıq Kelisimge qol qoyıw máselesin kórip shıǵıwdı usınıs etemiz.
Biz, sonday-aq, xalıqaralıq hám regionallıq kún tártibindegi áhmiyetli máseleler boyınsha ulıwmalıq poziciyalardı islep shıǵıw ushın sırtqı siyasat uyımları basshılarınıń ushırasıwların turaqlı ótkerip barıw, parlamentleraralıq baylanıslardı jedellestiriw hám «Oraylıq Aziya – Evropa Awqamı» parlamentleraralıq birge islesiw forumın shólkemlestiriw jáne onıń dáslepki ilajın bıyıl gúzde Ózbekstanda ótkeriw, jetekshi tallaw oraylarınıń birge islesiwin keńeytiwdi usınıs etemiz.
Sammitimizdi hár eki jılda bir márte ótkeriw boyınsha usınıstı tolıq qollap-quwatlaymız. Kelisimlerimizdi óz waqtında ámelge asırıwdı támiyinlew boyınsha sistemalı islesiw maqsetinde gezektegi májilisimizge shekem sammit sekretariatı funkciyasın óz moynımızǵa alıwǵa tayarmız.
Ekinshi. Ekonomika hám texnologiyalıq modernizaciyaǵa investiciyalar kirgiziw óz-ara birge islesiwimizdiń baslı norması bolıwı kerek.
Biz iyun ayınıń basında Evropa tikleniw hám rawajlanıw banki menen sheriklikte Tashkent xalıqaralıq investiciyalar forumın ótkeremiz. Bul ilajda Evropanıń jetekshi kompaniya hám bankleri menen ulıwma bahası 30 milliard evrodan zıyat bolǵan usı joybarlar portfelin usınıw niyetindemiz.
Búgingi kúnde Evropanıń barlıq biznes «kapitanları», sanaat hám innovaciya tarawlarınıń jetekshileri Ózbekstan hám regionımızdaǵı basqa da mámleketlerde tabıslı jumıs alıp barıp atırǵanın atap ótiw orınlı. Olardıń arasında «TOTAL», «Siemens», «Linde», «Airbus», «BASF», «IDF», «Orano», «OTP Group» hám basqa da kóplegen korporaciyalar bar.
Forum procesinde eki regionnıń investiciyalıq imkaniyatlarına baǵıshlanǵan óz aldına sessiyanı ótkeriwdi usınıs etemen. Ózbekstanda Evropa kompaniyaları ushın Regionallıq sanaat parki koncepciyası menen tanıstırıwdı da áne, usı sessiyada ótkeriwdi rejelestirip atırmız.
Usı kúnlerde Tashkentte Evropa investiciya bankiniń ofisin ashıw haqqında qol qoyılǵan kelisim Evropa Awqamı mámleketlerinen Oraylıq Aziyaǵa tikkeley investiciyalar aǵımın qollap-quwatlaydı.
Evropalı sheriklerimiz jáne bir baslamamızdı – «jasıl» energetika, innovaciyalar, transport, infrastrukturalıq tarawlarda, agrar sektorda iri regionallıq joybarlardı alǵa qoyıw ushın Investiciya platformasın iske qosıw boyınsha usınısımızdı qollap-quwatlaytuǵınına úmit etemiz.
Bunnan tısqarı, mámleketlerimizdiń ekonomikalıq máplerin jaqınlastırıw boyınsha bir qatar jańa usınıslardı bildirmekshimiz. Bul, bárinen burın, investiciyalardı qorǵaw hám xoshametlew haqqındaǵı kóp tárepleme kelisimge qol qoyıw, jeke sektordıń wákilliklerin keńnen tarta otırıp, «Oraylıq Aziya – Evropa Awqamı» birgeliktegi sawda platformasın iske túsiriw, kishi hám orta biznes joybarların, birinshi gezekte, hayal-qızlar isbilermenligin qollap-quwatlaw boyınsha birgeliktegi baǵdarlamalardı qabıl etiwge qaratılǵan.
Ózbekstanda óz-ara transport baylanıslılıǵı boyınsha gezektegi Ekonomikalıq forum hám Investorlar forumın qabıl etiwge tayarmız.
Sonday-aq, eksport etiwshilerimizdiń potencialın arttırıw, laboratoriyalar, standartlastırıw hám sertifikatlastırıw orayların jaratıw ushın Evropa Awqamınıń texnikalıq járdemin keńeytiw zárúr bolıp tabıladı.
Úshinshi. Sammit dawamında strategiyalıq mineral resurslar tarawında birge islesiw hám investiciyalardı tereńlestiriw boyınsha qarar qabıl etiledi.
Ózbekstan geologiya-razvedka, strategiyalıq shiyki zat materialları kánlerin ózlestiriw hám olardı qayta islew tarawında joqarı texnologiyalıq óndiris tarmaqların jaratıw baǵdarında Evropadaǵı jetekshi kompaniyalar menen birge islesiw boyınsha úlken unamlı tájiriybege iye ekenin atap ótiw kerek. Biz bul baǵdarda Evropa Awqamı menen óz-ara paydalı birge islesiwdi tereńlestiriwdi hár tárepleme qollap-quwtalaw niyetindemiz.
Usı ónimlerdi, sonday-aq, tayar sanaat hám awıl xojalıǵı tovarların Evropa bazarlarına jetkerip beriw ushın nátiyjeli transport koridorlarınıń joq ekeni bunda tiykarǵı tosqınlıq bolıp tabıladı. Sonıń ishinde, Transkaspiy transport koridorın keńeytiw hám júk penen támiyinlew ushın óz-ara muwapıqlastırılǵan ilajlardı hám biznes ushın paydalı sharayatlardı islep shıǵıw zárúr. Bul wazıypalar «Global dárwaza» ulıwmaevropa baǵdarlamasınıń maqsetlerine tolıq sáykes keledi.
Usı múnásibet penen, kelisilgen kózqaraslardı islep shıǵıw ushın Evropa Awqamınıń qáwenderliginde usı jóneliste jaylasqan mámleketlerdiń transport ministrleri ushırasıwın shaqırıwdı usınıs etemiz.
Tórtinshi. «Jasıl» energetika hám ekologiyalıq turaqlılıqqa qaratılǵan investiciyalar strategiyalıq áhmiyetke iye bolıp barmaqta.
Ózbekstan Oraylıq Aziya regionınan Evropaǵa elektr energiyasın jetkerip beriw boyınsha xalıqaralıq joybardı tolıq qollap-quwatlaydı.
Sammit qarsańında bul joybardı ámelge asırıw boyınsha tiyisli kelisimdi ratifikaciyaladıq.
Biz 2030-jılǵa barıp mámleket energiya balansında qayta tiklenetuǵın energiyanıń úlesin 54 procentke jetkeriwdi, 24 mıń megavatt «jasıl» quwatlıqlardı iske túsiriwdi rejelestirip atırǵanımızdı atap ótiw kerek.
«Taza» energiya boyınsha , «Oraylıq Aziya – Evropa Awqamı» sherikliginiń jolǵa qoyılıwı menen óz-ara birge islesiwimizdiń áhmiyetli platforması jaratılıwı múmkin.
Sonday-aq, «uglerod kreditleri» joybarların islep shıǵıwdı qarjılandırıw hám olardıń bazarın rawajlandırıw ushın túrles ministrliklerdiń basshıları dárejesinde jumısshı topardı shólkemlestiriwdi usınıs etemiz. Bolıp ótiwi kútilip atırǵan Klimat forumı barısında regionnıń «Jasıl» rawajlanıw koncepciyasın usınamız.
Besinshi. Insan kapitalına investiciyalar bilimlendiriw hám mádeniy-gumanitarlıq tarawlardaǵı almasıwlardı keńeytiw imkaniyatın beredi.
Joqarı mamanlıqtaǵı qánigelerdi tayarlaw boyınsha «ERAZMUS PLYuS» baǵdarlamaları sheńberinde region mámleketleri ushın arnawlı kvotalardı engiziw ushın maqsetke erisiwge xızmet etiwi múmkin.
Oraylıq Aziya mámleketleri menen ilimiy-bilimlendiriw birge islesiwin keńeytiw ushın Ózbekstanda «Gorizont – Evropa» baǵdarlamasınıń ofisin ashıwǵa tayarmız. Bunnan tısqarı, jasalma intellekt, maǵlıwmatlardıń «úlken bazaları» sanlastırıw, kosmoslıq izertlewler tarawında ilimiy hám texnologiyalıq almasıwlar boyınsha birgeliktegi baǵdarlamalardı islep shıǵıwdı usınıs etemiz.
Ózbekstan, sonday-aq, region mámleketlerin sanlı bildimlendiriw tarawında Evropa háreketler baǵdarlamasına qosıw, Oraylıq Aziya hám Evropa Awqamı mámleketleri universitetleri arasında sheriklik baǵdarında «Jol kartası»n ámelge asırıw boyınsha baslamalardı alǵa qoyadı.

Evropa háreketler baǵdarlamasına qosıw, Oraylıq Aziya hám Evropa Awqamı mámleketleri jetekshi universitetleri arasında sheriklik boyınsha «Jol kartası»n ámelge asırıw boyınsha baslamalardı alǵa qoyadı.
Evropalı qánigelerdiń qatnasıwında «Lázgi» milliy baletiniń saxnalastırılıwı mádeniyat tarawındaǵı kooperaciyanıń ayqın mısalı boldı. Evropadaǵı Luvr, Berlin Jańa muzeyi, Vena pútkil jáhán muzeyi sıyaqlı iri muzeylerde Oraylıq Aziyanıń tariyxıy miyrasına baǵıshlanǵan kórgizbeler tabıslı ótkerildi.
Usı jıldıń gúzinde bul jerde, Samarqandta ótetuǵın, sońǵı qırıq jılda Parijden tısqarıda birinshi márte bolatuǵın YuNESKO Bas konferenciyası barısında barlıq sırt elli sheriklerimizdi regionımız xalıqlarınıń bay mádeniyatı hám kórkem óneri menen jáne de keńnen tanıstırıwdı qáler edik.
Sonday-aq, bıyıl Buxarada birinshi márte «Oraylıq Aziya – Evropa Awqamı» turistlik forumın ótkeriwdi rejelestirip atırmız.
Evropa Awqamı mámleketleriniń tájiriybesin engiziw tiykarında «Bir tur – pútkil region» koncepciyasın ámelge asırıw, sonday-aq, regionımız turistleri ushın viza rejimin jeńilletiw máselesin kórip shıǵıwda evropalı sheriklerimizdiń járdemine súyenemiz.
Húrmetli delegaciyalar basshıları!
Qáwipsizlikke baylanıslı ulıwmalıq qáwipler, atap aytqanda, terrorizm, ekstremizm, radikalizm, kiberjınayatshılıq, narkotrafika hám nızamsız migraciyaǵa qarsı gúresiwde birge islesiw barǵan sayın áhmiyetli bolıp barmaqta.
Evropalı sheriklerimizdiń terrorizmge qarsı gúresiw máseleleri boyınsha sóylesiwdi jolǵa qoyıw haqqındaǵı usınısın qollap-quwatlaymız. «BOMCA» hám «CADAP» baǵdarlamaları sheńberinde óz-ara ámeliy birge islesiwdi keńeytiw áhmiyetli, dep esaplaymız.
Awǵanstandı tınısh rawajlandırıw máselelerinde siyasiy másláhátlesiwlerdi dawam ettiriwge tayarmız. Tilekke qarsı, dúnya jámiyetshiligi bul mámleket aymaǵınan kelip shıǵatuǵın barlıq qáwip-qáterlerdi jetkilikli bahalay almay atır.
Awǵan tárepin regionallıq ekonomikalıq processlerge, sonıń ishinde, investiciyalıq hám infrastrukturalıq joybarlardı ámelge asırıw, sociallıq tarawdı qayta tiklew jolı menen jedel tartıw zárúr, dep esaplaymız. Qabıl etilgen minnetlemelerdi orınlaw ushın xalıqaralıq jámiyetshiliktiń ámeldegi awǵan húkimeti menen konstruktiv sóylesiw ornatıw zárúrligin túsiniwinen hám qollap-quwatlawınan úmit etemiz.
Húrmetli sammit qatnasıwshıları!
Sózimniń juwmaǵında biziń baslama hám kelisiwlerimizdi ámelge asırıw mexanizmlerin engiziw zárúrligin ayrıqsha atap ótiwdi qáler edim.
Usı múnásibet penen, «Oraylıq Aziya – Evropa Awqamı» formatında Bas ministrdiń orınbasarları dárejesinde hár jılı ushırasıwlar ótkerip barılatuǵın Sheriklik komitetin dúziw maqsetke muwapıq, dep esaplaymız.
Qádirli doslar!
Bársheńizge ashıq, isenimli hám konstruktiv sóylesiw ushın jáne bir márte tereń minnetdarshılıq bildiremen.
Evropanıń jetekshi institutları hám qarjı shólkemleriniń basshıları Oraylıq Aziyanıń ulıwmalıq poziciyaǵa iye ekenine, isenimli hám juwapkershilikli sherik sıpatında keń kólemli birge islesiwge tayar ekeniniń gúwası bolǵanına bekkem isenemen.
Bársheńizdi eki region arasındaǵı strategiyalıq sheriklik ornatıw haqqındaǵı tariyxıy qarar qabıl etiliwi menen qutlıqlayman.
Erisilgen barlıq kelisimlerdi hám alǵa qoyılǵan baslamalardı ámelge asırıw ushın Sammit sekretariatı, ekspertler menen birgelikte, bir ay múddette, biz jumısshı tártipte tastıyıqlawımız múmkin bolǵan «Jol kartası»n tayarlaw usınısın bildiremen.
Itibarıńız ushın raxmet.