Ózbekstan Respublikası Prezidenti Shavkat Mirziyoev 4-aprel kúni Samarqand klimat forumı sheńberinde BMSh Bas xatkeri orınbasarı, Evropa ekonomikalıq komissiyasınıń atqarıwshı xatkeri Tatyana Molchandı qabılladı.

Sóylesiw basında joqarı mártebeli miyman mámleketimiz basshısına BMSh Bas xatkeri Antoniu Guterrishtiń sálemi menen shın kewilden jollaǵan tileklerin jetkerdi.
Mámleketimiz basshısı komissiyanıń 2030-jılǵa shekemgi dáwirinde Turaqlı rawajlanıw maqsetlerine erisiwdegi áhmiyetli ornın, sonday-aq, transport, innovaciyalar, toqımashılıq, energetika, ekologiya hám gender teńligi tarawlarında, Ózbekstannıń JSShǵa aǵza bolıwı máselelerinde kórsetilip atırǵan ekspertlik járdemin ayrıqsha atap ótti.
Regionallıq hám mámleket kólemindegi joybarlardı ámelge asırıw, sonday-aq, Ózbekstan Respublikası Prezidenti tárepinen 2023-jıl noyabr ayında Baku qalasında bolıp ótken BMShtıń Oraylıq Aziya ekonomikaları ushın arnawlı baǵdarlamanıń (SPEKA) birinshi sammitinde bildirilgen baslamaların ámeliy alǵa qoyıw jolları dodalandı.
Ózbekstan tárepiniń ótinishine bola SPEKAnıń 2030-jılǵa shekemgi rawajlanıw koncepciyası qabıl etilgenligi, EEK penen sawdanıń tártipleri hám principlerin ápiwayılastırıw boyınsha «jol kartası»na qol qoyılǵanı, Transkaspiy jolı sheńberinde sanlastırıw hám hújjetler almasıwı boyınsha kompleksli ilajlardıń izbe-iz ámelge asırılıp atırǵanlıǵı qanaatlanıwshılıq penen atap ótildi.
Jıl basında komissiya járdeminde Ózbekstan Xalıqtıń ekologiyalıq jaǵdayı haqqındaǵı isenimli xabardan paydalanıwı tuwralı Orxus konvenciyasına qosıldı.
Hawa konvenciyası hám Sanaat avariyalarınıń transshegaralıq tásiri haqqındaǵı konvenciyaǵa qosılıw máselesi islep shıǵılmaqta.
SPEKA baǵdarlamasınıń Maqsetli qorın tez arada iske túsiriw áhmiyetli ekenligi atap ótildi.