Qaraqalpaqstan Respublikası Konstituciyası qabıl etilgeniniń 32 jıllıǵı Respublikamız boylap keń túrde belgilenbekte. Hár bir joqarı oqıw ornı, mákeme hám shólkemlerde sáne múnásibeti menen bayram kesheleri, ushırasıw hám konferenciyalar shólkemlestirilmekte.

Muxammed al-Xorezmiy atındaǵı TITU Nókis filialında da bir 3atar taraw wákilleriniń qatnasıwında «Qaraqalpaqstan Respublikası Konstituciyası qabıl etilgeniniń 32 jıllıǵı» atamasında ilaj bolıp ótti. Onda Qaraqalpaqstan Respublikası Joqarǵı Keńesiniń komitet baslıǵı B.Seytnazarov, Qaraqalpaqstan Respublikası sudı baslıǵınıń orınbasarı B.Qıtaybekov, Qaraqalpaqstan Respublikası mámleketlik salıq basqarmasınıń baslıǵı X.Bekchanov, Tashkent informaciyalıq texnologiyalar universiteti Nókis filialı direktorı wazıypasın atqarıwshı R.Óteniyazov hám usı oqıw orınınıń pofessor -oqıtıwshıları menen student- jasları qatnastı.
Ilajda shıǵıp sóylewshiler nızamlı huqıqıy hújjet bolǵan Konstituciyamızdaǵı insan huqıqların qorǵaw, erkin puqaralıq huqıqları, jaslardıń bilim alıwı eń tiykarǵısı, insan mápi barlıq nárseden ústin turatuǵın elimizdegi insan huqıqları usı huqıqıy hújjet tiykarında qorǵalatuǵının atap ótti.
Atap ótilgenindey, Konstituciya –hár bir mámlekettiń tariyxı, búgingi kúni hám keleshegin, xalıqtıń erk -ıqrarın ózinde sáwlelendiriwshi nızam bolıp esaplanadı.
Qaraqalpaqstan Respublikası Konstituciyası 1993-jıl 9-aprel kúni on ekinshi shaqırıq Qaraqalpaqstan Respublikası Joqarǵı Sovetiniń on ekinshi sessiyasında qabıl etilgen. Qaraqalpaqstan Respublikası Konstituciyası alǵı sóz, 6 bólim, 26 bap, 121 statyadan ibarat.
Konstituciya ámelge asırılıp atırǵan demokratiyalıq reformalardıń hám olardıń nızamshılıq tiykarların jaratıwdıń baslı huqıqıy tiykarı, insan huqıqları menen erkinlikleriniń isenimli qorǵalıwınıń kepili bolıp esaplanadı. Bas Nızamımızda barlıq normalar eń aldı menen insannıń huqıq hám máplerin kepillikke ala otırıp, insan –jámiyet-mámleket principi tiykarında islep shıǵılǵan.
Student- jaslar tárepinen konstituciyalıq huqıqlar, salıq tarawındaǵı jeńillikler, sud sistemasındaǵı jańalıqlar haqqında berilgen sorawlarǵa qánigeler tárepinen tiyisli juwaplar berildi.

Qaraqalpaqstan xabar agentligi