Aldın xabar bergenimizdey, Qaraqalpaqstan Respublikası Joqarǵı Keńesiniń komitet baslıǵı M.Atamuratov Koreya Respublikasında xızmet saparında bolıp turıptı.

Koreya mámleketine xızmet saparınıń keyingi kúninde Koreya xalıqaralıq birge islesiw agentligi (KOICA) wákilleri menen de sóylesiwler alıp barıldı.
Qaraqalpaqstan Respublikası Joqarǵı Keńesiniń komitet baslıǵı M.Atamuratov Aral teńizi apatshılıǵı aqıbetlerin jumsartıw, Aralboyı regionı xalqınıń salamatlıǵın bekkemlew, sonday-aq, Qaraqalpaqstanda birgelikte joybarlardı ámelge asırıw hám joqarı bilimlendiriwde birge islesiw boyınsha KOICA menen tıǵız birge islesiwler ornatılǵanlıǵın atap ótti.
Onda KOICA menen ornatılǵan baylanıslardı ele de bekkemlew, Qaraqalpaqstanda IT tarawın rawajlandırıw, joqarı oqıw orınları menen birge til úyreniw orayların shólkemlestiriw, alternativ energiya dereklerinen paydalanıwdı en jaydırıw boyınsha sóylesiwler alıp barıldı.
Koreya xalıqaralıq birge islesiw agentligi (KOICA) menen eki tárepleme birge islesiwdi keńeytiw máselesinde Qaraqalpaqstanda qorshaǵan ortalıqtı qorǵaw hám IT tarawın rawajlandırıw baǵdarında grant qarjıları tiykarında 2026-2032-jıllarda jańa joybarlar ámelge asırılıwı kútilip atırǵanın atap ótiw orınlı.

Qaraqalpaqstan xabar agentligi