Ózbekstan Respublikası Oliy Majlisi Nızamshılıq palatasınıń Tájikstan Respublikası Majlisi Oliniń Majlisi namoyandagon menen birge islesiw boyınsha parlamentleraralıq toparınıń májilisi bolıp ótti. Onda Parlamentleraralıq topardıń 2025-jıl ushın is-rejesinde belgilengen wazıypalar hár tárepleme kórip shıǵıldı.

Bul parlamentleraralıq topar Ózbekstan hám Tájikstan arasındaǵı parlametleraralıq birge islesiwdi bunnan bılay da rawajlandırıw, eki mámleket qatnasıqlarınıń shártnamalıq-huqıqıy, nızamshılıq bazasın jetilistiriw maqsetinde Oliy Majlis Nızamshılıq palatası Keńesiniń tiyisli qararına muwapıq 7 deputattan ibarat quramda dúzilgen.

Topar basshısı, Nızamshılıq palatası Spikeriniń orınbasarı M.Xojaevanıń qatnasıwında ótken májiliste keyingi jıllarda Ózbekstan-Tájikstan baylanıslarınıń keńeyip atırǵanı ayrıqsha atap ótildi. Sonday-aq, jaqında Ózbekstan Respublikası Prezidenti Shavkat Mirziyoev hám Tájikstan Respublikası Prezidenti Emomali Rahmannıń qatnasıwında sırtqı siyasat uyımlarınıń basshıları Ózbekstan menen Tájikstan arasında Awqamlaslıq qatnasıqları haqqındaǵı shártnamanıń kúshke kiriwi haqqındaǵı protokolǵa qol qoyǵanı hám ratifikaciya jarlıqları almasılǵanına ayrıqsha itibar qaratıldı.

Sonıń menen birge, Ózbekstan, Tájikstan, Qırǵızstan mámleket basshıları úsh mámleket shegaraları tutasqan aymaqta Doslıq stelasınıń saltanatlı ashılıw máresimine qatnasqanı, bul mámleketler arasındaǵı baylanıslardı bunnan bılay da bekkemlewge xızmet etetuǵını ayrıqsha atap ótildi.

Májiliste eki mámleket parlamentleri arasında siyasiy, ekonomikalıq, mádeniy hám sociallıq tarawlardaǵı birge islesiwdi bunnan bılay da rawajlandırıw máseleleri kórip shıǵıldı. Nızam dóretiwshiligi baǵdarında óz-ara tájiriybe almasıw, doslıq qatnasıqların bekkemlew, joqarı dárejede erisilgen kelisimlerdi ámelge asırıw boyınsha qabıl etilgen «jol kartaları»nda belgilengen wazıypalardıń orınlanıwı boyınsha parlamentlik qadaǵalaw alıp barıw sıyaqlı máseleler parlamentleraralıq topar jumısınıń tiykarǵı baǵdarları etip belgilep alındı.

Muhtarama KOMILOVA,
ÓzAnıń xabarshısı