Ipotekanı qayta qarjılandırıw kompaniyası gezektegi tikkeley (mámleket kepilligisiz) qarız qarjıların Aziya Rawajlanıw Bankinen (ARB) tartıwǵa eristi.

Bul haqqında Ipotekanı qayta qarjılandırıw kompaniyası baspasóz xızmeti málim etti. Kompaniya hám ARB arasında 30 million AQSh dolları muǵdarında tikkeley (mámleket kepilligisiz) qarız qarjıların tartıw boyınsha sóylesiwler tabıslı juwmaqlandı hám shártnamaǵa qol qoyıldı.
Tartılǵan qarjılar Kompaniya tárepinen kommerciyalıq shártler tiykarında kommerciyalıq bankler usınatuǵın ipoteka kreditlerin hám jasıl turaq jaylardı qarjılandırıw hám qayta qarjılandırıw ushın qaratıladı.
– Bul shártnamaǵa qol qoyılıwı kompaniya hám ARB birge islesiwi sheńberinde gezektegi áhmiyetli tabıs bolıp tabıladı. ARB menen birge islesiwdi bunnan bılay da rawajlandırıw, kommerciyalıq banklerdi úzliksiz resurs penen támiyinlew hám bul arqalı xalıqtıń turaq jayǵa bolǵan talabın qanaatlandırıw, olarǵa ipoteka kreditleri boyınsha jáne de qolaylı sharayatlardı jaratıwda úlken áhmiyetke iye, – deydi Kompaniyanıń Bas atqarıwshı direktorı Murodjon Farmonov.

ÓzA