Qazaqstanǵa sapar sheńberinde Sanlı texnologiyalar ministrligi hám IT Park Uzbekistan delegaciyası “BILLZ” kompaniyasınıń wákilleri menen ushırastı.

“Smart Point Almaty” innovaciyalıq orayında bolıp ótken sóylesiw dawamında kompaniyanıń regiondaǵı jumısı hám kelesi rejeleri dodalandı.
“BILLZ” – usaqlap satıw sawdası hám biznesler ushın sanlı basqarıw sistemaların usınıs etiwshi platforma bolıp, Ózbekstanda tiykar salınǵan hám házir Qazaqstan bazarında da tabıslı jumıs islemekte.
Kompaniya usaqlap satıw sawdası kárxanalarına satıw processlerin avtomatlastırıw, qarıydarlar menen islesiwdi jaqsılaw hám biznestiń nátiyjeliligin arttırıwǵa járdem beretuǵın aldınǵı sheshimlerdi usınadı.
Ushırasıw dawamında “BILLZ”diń Qazaqstandaǵı jetiskenlikleri, qarıydarlar bazasınıń keńeyiwi, birge islesiw joybarları hám kompaniyanıń xalıqaralıq bazardaǵı strategiyası haqqında pikir alısıldı.
“BILLZ”diń regionallıq tabısı Ózbekstan IT-kompaniyalarınıń eksport potencialı hám texnologiyalıq jetikligin jáne bir márte tastıyıqlaydı.
Sonıń menen birge, delegaciya “Smart Point Almaty” orayında “EasyTap”, “Kwaaka”, “Sabre”, “Ioka” kompaniyaları menen ushırasıwlar ótkerdi. Sessiya sheńberinde Qazaqstan startapları óz ónimlerin, sonıń ishinde, fintech sheshimleri, bulıtlı platformalar hám elektron kommerciyanı avtomatlastırıw quralların usınıs etti.
Almatadaǵı ushırasıwlar eki mámleket biznesiniń birgeliktegi texnologiyalıq baslamalarǵa hám jańa bazarlarǵa shıǵıw boyınsha háreketlerdi birlestiriwge qızıǵıwshılıǵı artıp baratırǵanın tastıyıqlaydı.

N.Rahmanova, ÓzA