«Oraylıq Aziya – Evropa Awqamı» birinshi sammitiniń isbilermenlik baǵdarlaması 3-aprel kúni Ózbekstan Respublikası Prezidenti Shavkat Mirziyoev hám Evropa tikleniw hám rawajlanıw bankiniń prezidenti Odil Reno-Bassoniń ushırasıwı menen baslandı.

Mámleketimizdiń bul abıraylı xalıqaralıq qarjı institutı menen keń kólemli birge islesiwin jáne de rawajlandırıwdıń ámeliy tárepleri hár tárepleme kórip shıǵıldı.
Ózbekstan hám ETRB arasındaǵı strategiyalıq sheriklik qatnasıqlarında joqarı dárejege erisilgeni úlken qanaatlanıwshılıq penen atap ótildi. Tiykarǵı tarmaqlardaǵı birgeliktegi joybarlar portfeli turaqlı keńeyip barmaqta. Banktiń mámleketimizdiń ekonomikasına kirgizgen ulıwma investiciyaları 5 milliard evrodan arttı, sonıń ishinde, ótken jıldıń juwmaqlarına bola derlik 1 milliard evronı quradı. Qarjılay járdemniń tiykarǵı bólegi jeke menshik sektorǵa tuwra kelmekte.
Mámleketimiz boyınsha orta múddetli Sheriklik strategiyası nátiyjeli ámelge asırılmaqta. ETRB ekspertleriniń járdeminde bank tarawın transformaciyalaw hám biznes ushın imkaniyatlardı keńeytiw ilajları kórilmekte.
Ushırasıwda joybarlardıń orınlanıw sapasın jaqsılaw hám nátiyjeliligin arttırıw boyınsha birgeliktegi jumıslardıń óz nátiyjesin berip atırǵanı atap ótildi. Processlerdi optimallastırıw hám joybarlardı tayarlawdı tezlestiriw áhmiyetli ekenligi atap ótildi.
Kishi hám orta biznesti rawajlandırıw, hayal-qızlar hám jaslardıń isbilermenligin qollap-quwatlaw, mámleketlik-jeke menshik sheriklik joybarların, sonıń ishinde, bilimlendiriw, suw támiynatı, turmıslıq shıǵındılardı qayta islew sıyaqlı áhmiyetli baǵdarlarda keńeytiw máseleleri dıqqat orayında boldı.
«Jasıl» ekonomika, uglerod shıǵındıların azaytıw, sanlastırıw hám jasalma intellekt, ipoteka bazarı, transport kommunikaciyaların rawajlandırıw hám basqa tarawlardaǵı baǵdarlama hám joybarlar birge islesiwdiń tiykarǵı baǵdarları sıpatında belgilendi.
Usı jıl iyun ayında Tashkent xalıqaralıq investiciya forumı hám Sırt el investorları keńesiniń gezektegi májilisine tayarlıq kóriw hám olardı ótkeriw boyınsha pikir alısıldı.

ÓzA