Evropa Keńesi Prezidenti Antoniu Koshta Ózbekstan Respublikası sanlı texnologiyalar ministri Sherzad Shermatov penen Buxaraǵa keldi.

Joqarı mártebeli miymandı Buxara wálayatı hákimi Batır Zaripov hám basqa da juwapker adamlar kútip aldı. Sapar etiwdiń baǵdarlamasına muwapıq Evropa Keńesi Prezidenti Buxaranıń tariyxıy-mádeniy estelikleri menen jaqınnan tanıstı, muqaddes orınlardı zıyaratladı.
Antoniu Koshta Ismoil Samaniy maqbarasında boldı. Miymanǵa maqbaranıń tariyxı, bul jerde keyingi jıllarda ámelge asırılǵan dóretiwshilik, ońlaw-tiklew jumısları haqqında hár tárepleme maǵlıwmat berildi. Miyman elimizde mádeniy miyrastı qásterlep-saqlaw jumıslarına joqarı baha berdi hám mámleketimiz basshısı tárepinen alǵa qoyılǵan baslamalardı atap ótti.
Bunnan soń miyman Ark qorǵanında da boldı. Delegaciyanıń gezektegi mánzili Payı-Kalan kompleksi boldı. Payı-Kalan Buxaranıń eń kózge kóringen tariyxıy orınlarınan sanalıp, tek ǵana Ózbekstanda emes, pútkil dúnyada Orta Aziyanıń eń dıqqatqa ılayıq jerlerinen biri bolıp tabıladı. Tariyxıy hám arxitekturalıq estelikler joqarı mártebeli miymanda úlken qızıǵıwshılıq oyattı.
Evropa Keńesi Prezidenti Antontiu Koshta Buxaraǵa saparı waqtında Buxara gilemshilik orayında bolıp, bul jerde jipekten toqılıp atırǵan hár qıylı kólemdegi gilemlerdiń toqılıw procesin baqladı hám gilem toqıwshılardıń qol miyneti menen jaratılıp atırǵan miynetiniń jemisine joqarı baha berdi. – Hayran qalmastan ilaj joq. Názik hám shıraylı gilemlerdiń toqılıw procesin baqlaw adamǵa zawıq baǵıshlaydı. – Tań qaldım, – deydi Evropa Keńesi Prezidenti.
Miymanlar Buxara qalasınıń tariyxıy bóleginde kesteshilik, temirshilik hám basqa da ónermentshilik ónimleri menen tanıstı. Buxaranıń áyyemgi ónermentshilik dástúrlerin sáwlelendirgen bazar hám sawda orınları olarǵa kóterińki keypiyat baǵıshladı.
Sonıń menen Evropa Keńesi Prezidenti Antoniu Koshtanıń Buxaraǵa saparı juwmaqlandı. Mártebeli miyman sol kúnniń ózinde Samarqand qalasına jónep ketti.

Zarif Kamilov, ÓzAnıń xabarshısı