Házirgi waqıtta Qaraqalpaqstan Respublikası Joqarǵı Keńesiniń komitet baslıǵı M.Atamuratov basshılıǵındaǵı Qaraqalpaqstan delegaciyası xızmet saparı menen Koreya Respublikasında bolıp turıptı.

Sapar dawamında respublikamız wákilleri 518 GROUP kompaniyası wákilleri menen ushırasıw ótkerdi. Onda Koreyanıń Ulsan provinciyası menen birge kásipke tayarlaw hám til úyretiw orayların shólkemlestiriw, bul arqalı talap joqarı bolǵan tar qánigeliklerge baǵdarlaw, bunnan soń oraydı pitkerip shıqqanlardıń bántligin támiyinlew hám basqa da usı sıyaqlı áhmiyetli máseleler talqılandı.
Sonday-aq, delagaciyamız aǵzaları Koreyanıń «ECO bio» kompaniyası wákilleri menen de ushırasıw ótkerdi. Onda turmıslıq shıǵındılardı nátiyjeli qayta islew, usı arqalı biogaz islep shıǵarıwdı jolǵa qoyıw, awıl xojalıǵın rawajlandırıwda birge islesiw, egislik maydanlarında zúráátlilikti arttırıw boyınsha sóylesiwler alıp barıldı. Ushırasıwda Qaraqalpaqstanda shıǵındılardı qayta islew arqalı biogaz islep shıǵarıwdı jolǵa qoyıw ushın arnawlı kárxana qurıw boyınsha memorandumǵa qol qoyıwǵa kelisip aldı.
Sonıń menen birge, Qaraqalpaq mámleketlik universiteti menen birge biosulfattan awıl xojalıǵında keńnen paydalanıwdı jolǵa qoyıw, arnawlı laboratoriya shólkemlestiriw boyınsha kelisimge erisildi.

Qaraqalpaqstan xabar agentligi