2025-jıl 1-iyunnan abıraylı xalıqaralıq pán olimpiadalarınıń jeńimpazları hám sıylı orın iyelerine tólenetuǵın bir mártelik aqshalay sıylıqtıń ámeldegi muǵdarları 5 esege arttırıladı.

Bul baǵdarda Prezidenttiń «Ózbekstan Respublikası Prezidentiniń jaslar menen ashıqtan-ashıq sóylesiwinde belgilengen wazıypalardı ámelge asırıwǵa baylanıslı ilajlar haqqında»ǵı PP-61-sanlı pármanı qabıl etildi.
Hújjet penen, sonday-aq, bıyıl 1-iyunnan abıraylı xalıqaralıq reyting shólkemleriniń joqarı 100 lik dizimine kirgizilgen sırt el joqarı bilimlendiriw shólkemlerinde ilimiy dáreje (PhD hám oǵan teńlestirilgen basqa ilimiy dáreje) alǵan 35 jasqa shekemgi qánigelerge turaq jay satıp alıw ushın turaq jay jaylasqan aymaqtan kelip shıǵıp, on jıl múddetke BEMniń 2 150 esesine shekemgi muǵdarda procentsiz ssuda ajıratıladı.
Bunnan tısqarı, 2025-jıldan «El-yurt umidi» qorınıń jańa stipendiya baǵdarı sıpatında «Jarqın qábilet» joybarı engiziledi hám joybar ushın 300 milliard sum ajıratıladı.
Onda tómendegiler názerde tutıladı:
– hár jılı qábiletli, bilimge qushtar, shańaraqlıq jaǵdayı awır bolǵanı sebepli oqıw imkaniyatına iye bolmaǵan kámbaǵal shańaraqlardıń perzentlerin sırt elde oqıtıw maqsetinde hár bir máhálleden belsendi jaslardı saylap alıw;
– saylap alınǵan jaslardıń qábiletin anıqlaw arqalı olardı imkaniyatına sáykes túrde joqarı oqıw orınlarına jiberiw ushın tayarlıq kurslarında oqıtıw;
– «El-yurt umidi» qorı arqalı sırt ellerde oqıp qaytqan stipendiatlar milliy kadrlar rezervine tikkeley kirgiziledi hám olar mámleketlik uyımlar, shólkemler hám mákemelerine tańlawsız jumısqa alınadı.

Qaraqalpaqstan xabar agentligi