Usı jıl 2-aperl kúni Oliy Majlis Senatı Baslıǵı Tanzila Norboeva Parlamentleraralıq awqamnıń Bas xatkeri Martin CHungong penen ushırasıw ótkerdi.

Ushırasıwda Ózbekstanda ótkeriletuǵın Parlamentleraralıq awqamnıń yubiley 150- assambleyasına tayarlıq kóriwge baylanıslı tiykarǵı máseleler hám parlament reformaları tarawındaǵı birge islesiwdi jáne de rawajlandırıw dodalandı.
Assambleyanıń Ózbekstanda ámelge asırılıp atırǵan reformalarǵa tolıq sáykes keletuǵın «Sociallıq rawajlanıw hám ádillik ushın parlament háreketi» temasınıń tariyxıy áhmiyetineke ayrıqsha itibar qaratıldı. Ózbekstan parlamenti jumısınıń unamlı tárepleri basqa mámleketler ushın úlgi bolıwı múmkin ekenligi atap ótildi.
M.CHungong Ózbekstan parlamentiniń Parlamentleraralıq awqam menen nátiyjeli birge islesiwi ushın minnetdarshılıq bildirip, mámleketimizdiń Parlamentleraralıq awqamnıń jumısına qosıp atırǵan salmaqlı úlesin atap ótti.
Ushırasıw juwmaǵında tárepler Tashkentte ótkerilip atırǵan Parlamentleraralıq awqamnıń yubiley assambleyası xalıqaralıq parlamentarizm tariyxında áhmiyetli waqıya bolatuǵınına hám global mashqalalardı sheshiwde parlamentlerdiń rolin kúsheytiwge isenim bildirdi.

Qaraqalpaqstan xabar agentligi