Argentinalı diplomat, Atom energiyası boyınsha xalıqaralıq agentlik (MAGATE) bas direktorı Rafael Grossi BMSh Bas xatkeri lawazımına kandidaturasın qoyıw niyetin bildirdi. Antoniu Guterrishtiń wákilligi 2026-jılı juwmaqlanadı. Bul haqqında «La Nacion» gazetası xabar tarqattı.

– Guterrishtiń izbasarın tańlawǵa ele kirisilmedi, – dedi Grossi Argentina xalıqaralıq baylanıslar keńesi (CARI) májilisinde. Process jıldıń aqırında, Bas Assambleya kandidatlar boyınsha shaqırıw járiyalaǵanda baslanadı. Men bul haqqında júdá kóp oylap atırman.
Óziniń atap ótiwinshe, Grossi Prezident Xaver Miley menen jaqın baylanısta, onıń menen birge keń kólemli xalıqaralıq máselelerdi dodalaǵan, sonıń ishinde bul tema boyınsha da kóp sóylesken.
1961-jılı Buenos-Ayreste tuwılǵan Rafael Grossi diplomatlıq xızmette 35 jıldan aslam tájiriybege iye. Argentinanıń Avstraliyadaǵı elshisi, Venadaǵı xalıqaralıq shólkemlerdegi turaqlı wákili sıyaqlı hár qıylı joqarı lawazımlarda islegen.
Grossi 2019-jıl dekabrde MAGATE bas direktorı etip tayınlanǵan hám 2023-jılı martta ekinshi múddetke saylanǵan.

Qaraqalpaqstan xabar agentligi