Prezidenttiń tiyisli qararına tiykarlanıp aymaqlarda tutınıwshılardı optimal energiya resurslarınan paydalanıwǵa ótkeriw hám energiya únemlewshi texnologiyalardı ornatıw arqalı 2,5 milliard kVt saat elektr energiyasın hám 1,1 milliard metr kub tábiyǵıy gazdi únemlew maqset etildi.

Oǵan tutınıwshılar tárepinen qayta tikleniwshi energiya derekleriniń qurılmalarınan paydalanıw hám qosımsha 74 mıńnan artıq obektte jámi quwatlıǵı 785 MVt bolǵan quyash panellerin hám 9 mıńnan artıq 1,2 mln litrli quyash kollektorların ornatıw esabınan 1,6 milliard kVt saat elektr energiyasın únemlew, xalqı sociallıq jaqtan awır jaǵdayda bolǵan 300 máhállede quwatlılıǵı 100 MVttan artıq kishi quwatlıqtaǵı fotoelektr stanciyaların qurıw esabınan 45 million metr kub tábiyǵıy gazdi únemlew arqalı erisiledi.
Bunnan tısqarı, byudjet shólkemlerinde energiya únemlewshi úskenelerden paydalanıwdı keńeytiw esabınan 39 million kub metr tábiyǵıy gazdi únemlep qalıw da názerde tutılǵan.
Sonıń menen birge, 2025-jıl 1-mayǵa shekem Energetika ministrligi janındaǵı byudjetten tısqarı Tarmaqlararalıq energiyanı únemlew qorınıń «Jasıl jeńillik» málimleme sisteması birge islesiwshi kommerciyalıq banklerdiń tiyisli málimleme baǵdarlamaları menen integraciyalanadı.

Qaraqalpaqstan xabar agentligi