Sońǵı waqıtlarda jaslardıń bántligin támiyinlew hám shańaraǵına qosımsha dáramat tabıwı ushın mámleketimizde bir qatar ilajlar alıp barılmaqta. Usınday ilajlar Nókis rayonında da alıp barılıp, jaslardı jumıs penen támiyinlewge baǵıshlanǵan miynet yarmarkası shólkemlestirildi.

Ilajǵa Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev, Nókis rayonı hákimi Z.Zaytov hám Qaraqalpaqstan Respublikası Jaslar isleri agentligi basqarması baslıǵı P.Maxsetbaevlar qatnastı.
Miynet yarmarkasında rayonda jaslardıń bántligin támiyinlew hám jaslar arasında qoyanshılıq tarawın rawajlandırıw maqsetinde aymaqtaǵı jumıssız bolǵan 33 jasqa 264 násilli qoyanlar subsidiya tiykarında tapsırıldı.
Hár bir jasqa 8 bas qoyannan berilip ǵana qoymastan, bul qoyanlar ushın arnawlı ketekler hám 1 aylıq azıqlıq ónimleri de berildi.
Bul qoyanlardı baǵıw hám olardıń kútimi boyınsha tájiriybeli qánigeler tárepinen arnawlı seminar da shólkemlestirildi. Seminar dawamında jaslar ózleriniń qızıqtırǵan sorawlarına juwap aldı.
-Mámleketimizde biz jaslar ushın jaratılıp atırǵan imkaniyatlardan kewlimiz tolmaqta. Tez kóbeyetuǵın hám azıqlanıwı ushın kóp qárejet ketpeytuǵın 8 qoyannan subsidiya tiykarında alıp atırmız. Bul aldaǵı waqıtlarda shańaraǵımızǵa qosımsha dáramat deregi bolatuǵınına isenemiz,-deydi Qutankól MPJ turǵını R.Sibushev.

Qaraqalpaqstan xabar agentligi