Usı jıldıń 5-9-aprel kúnleri Tashkent qalası jáhán parlamentarizmi dúnyasındaǵı eń áhmiyetli waqıya – Parlamentleraralıq Awqamnıń 150-yubiley assambleyası ushın áhmiyetli sóylesiw maydanına aylanadı.

Usı múnásibet penen Ózbekstanǵa Parlamentleraralıq Awqam baslıǵı Tuliya Ekson keldi.
– Abıraylı ánjumanǵa 2 mıńǵa shamalas qatnasıwshınıń jıynalıwı kútilmekte,-dedi T.Ekson. – Biziń bul jerge saparımız Ózbekstanǵa bolǵan joqarı húrmetimizdi hám bul jerde alıp barılıp atırǵan processlerge úlken itibar qaratıp atırǵanımızdı kórsetedi, álbette. Sonıń menen birge, Ózbekstan Parlamentleraralıq Awqamnıń diplomatiya, demokratiya sıyaqlı principlerin jedel qollap-quwatlap atırǵan mámleketlerden biri ekenine isenemiz.
Sońǵı jılları ámelge asırılǵan reformalar joqarı maqtawǵa ılayıq hám mámleketińiz qanday rawajlanıp atırǵanın kórip turmız. Usı múnásibet penen jáne bir márte Ózbekstan Prezidentin hám Senat Baslıǵın bul baǵdardaǵı háreketleriniń nátiyjesi menen qutlıqlayman.
Assambleya dawamında biz ádalat hám sociallıq rawajlanıw temaların birlestirip, olardı qalay úylesikli túrde rawajlandırıw múmkin ekenligin dodalaymız. Ilaj qatnasıwshıları kámbaǵallıqtı qısqartıw hám turaqlı rawajlanıwdı támiyinlewde parlament aǵzalarınıń roli, bilimlendiriw, densawlıqtı saqlaw hám ekologiya tarawlarında xalıqaralıq birge islesiwdi keńeytiw, gender teńlikti ámelge asırıw, hayal-qızlardıń hám jaslar huqıqların qorǵawdı kúsheytiw, demokratiya hám nızam ústinliginiń zamanagóy mashqalaları sıyaqlı áhmiyetli máselelerdi dodalaydı.
Assambleya sońında qatnasıwshı mámleketlerdiń xalıqaralıq birge islesiwdiń tiykarǵı máseleleri boyınsha anıq poziciyasın sáwlelendiriwshi baǵdarlamalıq hújjet – Tashkent deklaraciyası qabıl etiliwi kútilmekte.

Norgul Abduraimova,
ÓzA