Erteń 3-aprel kúni 17 jasqa shekemgi jas óspirimler arasında Aziya chempionatı baslanadı.

Tariyxta 20-márte ótkerilip atırǵan bul jarısqa Islam Ismailov basshılıǵındaǵı Ózbekstan saylandı komandası da qatnasadı.
Komandamız jarıstıń dáslepki topar basqıshında 3-aprel kúni Tailand, 6-aprel kúni Qıtay, 9-aprel kúni Saudiya Arabstanı saylandı komandaları menen kelesi basqısh jollaması ushın óz-ara oynaydı. Áhmiyetli tárepi sonda, saylandı komanda quramında qaraqalpaqstanlı 3 futbolshı, yaǵnıy, 9-nomerde hújimshi Nurbek Sarsenbaev («Jayhun»), 12-nomerde dárwazaman Bahadır Izbasqanov («Bunyodkor») hám 19-nomerde yarım qorǵawshı Azizbek Erimbetovlar da qatnasadı.
Maǵlıwmat ushın aytatuǵın bolsaq, eger, saylandı komandamız óz toparında birinshi yaki ekinshi orındı iyelep, sherek finalǵa shıqsa, onda futbolshılarımız 2025-jıldıń noyabr ayında ótkeriletuǵın jáhán chempionatına jollamanı qolǵa kirgizedi.
Bul álbette, jas futbolshılarımız ushın oǵada qolaylı imkaniyat bolıp tabıladı.

Adilbay Orazov,
Qaraqalpaqstan xabar agentligi sholıwshısı.