3-4-aprel kúnleri Samarqand qalasında «Oraylıq Aziya – Evropa Awqamı» birinshi sammiti bolıp ótedi.

Ózbekstan Respublikası Prezidenti Shavkat Mirziyoevtiń basshılıǵında ótetuǵın sammit jumısında Evropa keńesi Prezidenti Antoniu Koshta, Evropa komissiyası Prezidenti Ursula fon der Lyayen, Qazaqstan Respublikası Prezidenti Qasım-Jomart Tońaev, Qırǵız Respublikası Prezidenti Sadir Japarov, Tájikstan Respublikası Prezidenti Emomali Rahmon hám Túrkmenstan Prezidenti Serdar Berdimuhamedov qatnasadı.
«Keleshekke investiciya kirgiziw» súreni astında ótkeriletuǵın ilajda Evropa tikleniw hám rawajlanıw banki hám Evropa investiciya banki basshıları da qatnasıwı kútilmekte.
Kún tártibine muwapıq, Oraylıq Aziya mámleketleri hám Evropa Awqamı arasındaǵı kóp táreplemeli qatnasıqlar hám ámeliy birge islesiwdi rawajlandırıw perspektivaları kórip shıǵıladı.
Investiciyalıq birge islesiwdi keńeytiw hám tovar almasıwdı kóbeytiw, innovaciyalar, «jasıl» energetika, taw-kán, awıl xojalıǵı, transport, logistika hám sanlastırıw tarawlarında birgeliktegi baǵdarlama hám kooperaciyalıq joybarlardı ámelge asırıw, mádeniyat, turizm, ilim, bilimlendiriw hám basqa da tiykarǵı baǵdarlarda jedel almasıwlardı dawam ettiriw máseleleri dıqqat orayında boladı.
Delegaciyalar basshıları xalıqaralıq hám regionallıq siyasattıń áhmiyetli tárepleri boyınsha da pikir alısadı.
Baǵdarlamaǵa muwapıq, Oraylıq Aziya mámleketleri jetekshileri hám Evropa Awqamınıń tiykarǵı institutlarınıń basshıları 4-aprel kúni óz jumısın baslaytuǵın Samarqand xalıqaralıq klimat forumınıń jalpı májilisinde qatnasadı.
Bunnan tısqarı, sammit sheńberinde Ózbekstan Respublikası Prezidenti sırt el delegaciyalarınıń basshıları menen bir qatar eki tárepleme ushırasıwlar ótkeriwi názerde tutılǵan.

ÓzA