Keshe 31-mart kúni saat shama menen 12.19 da Izbasqan rayonı Mırza Ulıǵbek máhállesi táháret alıw ornında hawa-gaz aralaspası shaqnawı – jarılıw júz berdi.

Baxıtsız hádiyse – jarılıw júz bergen waqıya ornına dárhal órt óshiriw – qutqarıw toparları, sonday-aq, wálayat hákimi Shuhratbek Abdurahmanov, Ayrıqsha jaǵdaylar, Ishki isler basqarmalarınıń basshıları hám juwapker adamları, tex medicinalıq járdem xızmetiniń xızmetkerleri jetip barǵan. Jarılıwǵa baylanıslı jaǵday tolıq qadaǵalawǵa alınǵan.
Keshe wálayat hákimligi, ayrıqsha jaǵdaylar basqarması, wálayat prokuraturası tárepinen waqıya boyınsha dáslepki maǵlıwmatlar járiyalandı. Jarılıw aqıbetinde 10 puqara hár qıylı dárejede tán jaraqatı alǵan, 3 puqara – M.Abdullaev, J.Anvarov, B.Burxanov qaytıs bolǵan.
Xabarshılarımız Isbasqan rayonında bolıp, hádiyse boyınsha bir qatar juwapker adamlar menen sáwbetlesti.
Mahmudjan Nurmatov, Izbasqan rayonı ayrıqsha jaǵdaylar bóliminiń baslıǵı, podpolkovnik:
– Keshe, joqarıda aytılǵanınday, saat 12.19 larda meshittiń táháret alıw bólmesinde jarılıw júz bergeni haqqında xabar alǵannan soń, ayrıqsha jaǵdaylar bóliminiń 2 qutqarıw otryadı, 2 órt-qutqarıw ekipajı waqıya ornına dárhal jetip kelgen.
Sonday-aq, waqıya ornına Ishki isler, Milliy gvardiya, Tez medicinalıq járdem xızmetiniń xızmetkerleri de jetip barǵan. Jarılıwǵa baylanıslı jaǵday tolıq qadaǵalawǵa alınǵan, zárúr qutqarıw jumısları alıp barılǵan.
Hádiyse nátiyjesinde táháret alıw bólmesiniń diywal hám tóbe konstrukciyasına zıyan kelgen, qulap túsken, órt júz bermegen.
Jarılıw aqıbetlerin saplastırıw, qutqarıw, jábirlengenlerge járdem kórsetiw jumıslarına joqarıdaǵı xızmetlerdiń 500 ge shamalas xızmetkerleri menen qánigeleri qatnastı, 70 ke shamalas hár qıylı texnika quralları tartıldı.
Baxıtsız hádiyse sebepli qaytıs bolǵan jerleslerimizdiń shańaraq aǵzalarına hám jaqınlarına kewil bildirildi.
Hádiyseniń kelip shıǵıw sebepleri dúzilgen húkiemtlik komissiya tárepinen úyrenilip, tiyisli juwmaqlar járiyalanadı.

Ahrarbek Abdujabbarov, Izbasqan rayonı medicina birlespesiniń basshısı:
– Bárinen burın, baxıtsız hádiyse sebepli qaytıs bolǵan puqaralardıń jaqınlarına kewil bildiremen.
Keshe waqıya júz bergeni haqqında xabar kelip túsiwi menen rayonlıq tez medicinalıq járdem xızmetiniń shıpakerleri dárhal waqıya ornına jetip barǵan. Jábirlengenler, stress halatına túsken puqaralarǵa birinshi medicinalıq járdem kórsetildi.
Rayonlıq oraylasqan emlewxanasına jarılıw nátiyjesinde hár qıylı dárejede tán jaraqatın alǵan 10 puqara alıp kelingen. Olardıń ekewine ambulatoriyalıq járdem kórsetilip, jaǵdayı unamlı bolǵanı ushın úylerine juwap berildi. 8 tán jaraqatın alǵan puqaraǵa birinshi medicinalıq járdem kórsetilip, olar wálayatlıq tez medicinalıq járdem orayına jiberildi.
Házir jaǵdayı ortasha-awır jaǵdayda bolǵan áne, usı puqaralar stacionar sharayatta emlenbekte.
Ministrler Kabinetiniń tiyisli biyligi menen dúzilgen Húkimetlik komissiya, wálayat hákimligi tárepinen jarılıw nátiyjesinde qaytıs bolǵan puqaralardıń jerlew máresimlerin ótkeriw, olardıń shańaraq aǵzalarına hár tárepleme járdemlesiw boyınsha zárúr barlıq jumıslar ámelge asırılmaqta.
Bul jaǵday boyınsha Ándijan wálayatlıq prokuraturası tárepinen Ózbekstan Respublikası Jınayat kodeksiniń 205-259-statyaları menen jınayat isi qozǵatılıp, dáslepki tergew háreketleri alıp barılmaqta.

F. Ubaydullaev,
Z.Umrzaqov (surat), ÓzAnıń xabarshıları