Bıyıl 5-9-aprel kúnleri birinshi márte Ózbekstanda Parlamentleraralıq Awqamnıń 150-yubiley assambleyası ótkeriledi. Bul xalıqaralıq ánjuman tek ǵana Ózbekstan emes, al Oraylıq Aziyada birinshi márte shólkemlestirilip atırǵanı menen itibarǵa ılayıq.

Mámleketimizdiń jámiyetlik-siyasiy turmısında áhmiyetli tariyxıy waqıya sıpatında tán alınıp atırǵan assambleyada 200 ge shamalas mámleket wákilleri, dúnya parlamentariyleri jıynaladı.
Parlament izertlewleri institutı tárepinen «Parlamentleraralıq Awqam: statusı, strategiyalıq wazıypaları hám Ózbekstan menen birge islesiwi» atamasındaǵı qollanba tayarlandı.
Bul qollanbada Parlamentleraralıq Awqam jumısı, onıń tiykarǵı baǵdarları, shólkemlestiriwshilik dúzilisi, strategiyalıq maqsetleri sáwlelengen. Sonday-aq, Ózbekstannıń bul shólkemge aǵzalıǵı, shólkem sheńberindegi jumısı, milliy parlamentarizmniń qatnasıw dárejesi hám birge islesiw arqalı erisilip atırǵan nátiyjeleri tallanǵan. Qollanba abıraylı shólkemniń jumısı haqqında tolıq maǵlıwmatqa iye bolıw hám jaqınnan túsiniwge járdem beredi.
Parlamentleraralıq Awqam assambleyasında insan huqıqları, nızam ústinligi, jaslardı qollap-quwatlaw, kámbaǵallıqtı azaytıw, sociallıq qorǵaw hám inklyuziya, múnásip miynet, gender teńlik, ilim, texnologiya sıyaqlı áhmiyetli máseleler dodalanadı. Sonday-aq, klimat ózgeriwi, hayal-qızlar salamatlıǵı hám parlament diplomatiyasına baǵıshlanǵan seminarlar rejelestirilgen.
Bul abıraylı ánjumannıń Ózbekstanda ótkeriliwi mámleketimizde ámelge asırılıp atırǵan túpkilikli reformalar, sırtqı siyasatqa bolǵan xalıqaralıq isenim hám tán alıwdıń ayqın belgisi bolıp esaplanadı.

M.Komilova, ÓzA