Ózbekstan Respublikası Bas ministriniń orınbasarı – ekonomika hám qarjı ministri Jamshid Qwchqorov Aziya rawajlanıw banki (ARB) Oraylıq hám Batıs Aziya departamenti bas direktorı Evgeniy Jukov basshılıǵındaǵı delegaciya menen ushırastı.

Ushırasıwda Ózbekstan hám ARB arasındaǵı birge islesiwdi jáne de rawajlandırıw máseleleri dodalandı. Sóylesiwler dawamında kishi hám orta biznesti rawajlandırıw strategiyası, mámleket byudjetine járdem beriw, bilimlendiriw, energetika, transport, suw támiynatı hám qala qurılısı baǵdarlarındaǵı joybarlardı keńeytiw máseleleri kórip shıǵıldı.
Sonday-aq, ekologiyalıq transformaciya hám turaqlı rawajlanıw boyınsha jańa baslamalar dodalandı. Energiya nátiyjeliligin arttırıw maqsetinde «super ESCO» sistemasın engiziw máselesi de kún tártibine kirgizildi.
Ministrliktiń málimleme xızmetiniń xabar beriwinshe, bul sóylesiw sheńberinde ARB hám Ipotekanı qayta qarjılandırıw kompaniyası arasında birge islesiwdi rawajlandırıw boyınsha shártnamaǵa qol qoyıldı.
Ushırasıw sońında tárepler birge islesiwdi jáne de rawajlandırıw, jańa joybarlardı qollap-quwatlaw hám texnikalıq járdem sheńberindegi birge islesiwdi bekkemlew baǵdarında kelisimge eristi.

N.Ziyodullaeva, ÓzA