Oraylıq Aziya mámleketleri ǵárezsizlikke erisken bolsa da, uzaq waqıt olar arasındaǵı shegaralar jabıq edi. Tikenli sım tartıp júzlegen kilometr qándek qazılǵanı da xalıqtıń yadında. Búgin bolsa…tınısh zaman keldi. Ózbek qırǵız, tájik penen tuwısqan aǵa-inidey qádirdan. Bayram, toy-tamashası bir-birisiz ótpeydi.

Úsh xalıq, úsh mámleket basshıları qolın-qolına berip ázeliy tuwısqanshılıqqa máńgi estelik ornatıwǵa qarar etti. Ózbekstan – Tájikstan – #ırǵızstan shegaraları tutasqan keńlikte «Doslıq simvolı» stellası qurıp pitkerildi. Onıń ashılıwına bolsa úsh xalıqtıń wákilleri bardı.
«Doslıq simvolı» bir tamırdan ósip shıqqan úsh daraqqa uqsaydı. Awa, haqıyqatında da xalıqlarımız ázelden bir shańaraqtıń úsh perzentindey jasap kelgen. Kókke boy sozǵan úsh nálsheler biyǵárez úsh mámlekettiń simvolı. Olardı bir belbew baylap tur. Bul – doslıq belbewi. Búgin bolsa úsh mámleket, úsh xalıq máńgilik tuwısqan ekeni Prezidentler qol qoyǵan kelisim menen tastıyıqlandı.
Tájikstannıń Suǵd wálayatındaǵı olardıń ushırasıwı barısında «Doslıq simvolı»n ashıwǵa ruqsat etildi. Úsh mámleket bas ministriniń orınbasarları ráńbáreń lentanı kıyıp «Doslıq simvolı»n ashtı. Bársheniń qálbi maqtanıshqa toldı. Birin-biri búgingi kún menen qutlıqladı.
– Aldın post qoyıp taslaǵan edi, bir-birimizdi kóriwge bara almaytuǵın edik. Endi biymálel Ózbekstanǵa kelip-ketemiz. Prezidentler júdá xalıqshıl siyasat júrgizbekte, – deydi Batkent wálayatı Zartesh awılında jasaytuǵın Ahmedjan Jusupov. – Elge bárinen burın tınıshlıq kerek. Búgingi ushırasıwdan úmitimiz úlken. Prezidentler birden-bir mákan, ortaq bazar jaratıp beremiz, dep atır. Isbilermenlik jáne de rawajlanadı.
– Tájikstan – #ırǵızstan – Ózbekstan shegaralarında biraz mashqalalar bar. Shavkat Mirziyoev olardı saplastırıwda inta kórsetti hám bizge úlken járdem berdi, – deydi Tájikstan Respublikası bas ministriniń orınbasarı Sulayman Rizay Ziyozada. – Tájik hám qırǵız xalıqlarınıń ármanları ámelge astı. Endi shegara máselesinde hesh qanday mashqala qalmadı. Bul úsh mámleket Prezidentleriniń dana siyasatınıń nátiyjesi bolıp tabıladı.
Awa, qońsıń tınısh bolsa, sen tınısh degen naqıl bárshege birdey tiyisli edi. Sol ushın da adamlar ol ózbek pe, qırǵız ba, tájik pe búgingi kúnnen razı.
– Tájik jerinde úsh perzent qolın-qolına berip «Doslıq simvolı»n ashıp berdi. Men baxıtlı hayalman. Olar menen birge usı tariyxıy waqıyanıń qatnasıwshısı boldım, – deydi Tájikstannıń Isfara rayonınan kelgen Shoxira Ywldosheva. – Shegaralar ashıldı, áyyemgi tuwısqanlıq tiklendi.Ullı shayır Tursınzada da usınday kúnlerdi árman etken edi.
-Búgingi kún tariyxta qaladı. «Doslıq simvolı» ápiwayı estelik emes. Úsh mámleket, úsh xalıq ushın muqaddes orınǵa aylandı. Biz, húkimet basshıları Prezidentler búgin qol qoyǵan kelisimlerdi álbette orınlaymız. Sebebi olar xalıqlarımızdıń doslıǵı máńgi bolıwına bekkem tiykar bolıp tabıladı, – deydi #ırǵızstan Respublikası bas ministriniń orınbasarı Bakid Torabaev.
Ele zamanlar ótedi. Áwladlar jańalanadı. Biraq miyras qaldırıp atırǵan estelik úsh xalıq, úsh mámleket Prezidentleriniń tınıshlıq, tuwısqanlıq, keleshek jolındaǵı adamgershilik qararınan ásirler boyı derek berip tura beredi.

Muhammadjan OBIDOV,
ÓzAnıń xabarshısı