Arkadaǵ qalasında «Tınıshlıq hám isenim jılı: balalar ushın xalıqaralıq jumıslardı rawajlandırıw» atamasında xalıqaralaıq konferenciya bolıp ótti.

Gurbangulı Berdimuxamedov atındaǵı qayırqomlıq qorınıń dúzilgenine tórt jıl tolıwı múnásibeti menen shólkemlestirilgen ilajǵa Ózbekstan Respublikası Prezidentiniń járdemshisi Saida Mirziyoeva qatnastı.
— Oguljaxon Gurbangulievna Atabaeva xanımnıń mirát etiӯi boyınsha Túrkmenstanda shólkemlestirilgen xalıqaralıq konferenciyada qatnasıw sharapatına miyasar boldım, — dedi Prezident járdemshisi. — Xalıqlarımızdı tek ǵana qońsıshılıq emes, al ásirler dawamında qáliplesken tuwısqanlıq baylanıslar, ortaq mádeniyat hám ullı tariyx baylanıstırıp turadı.
Konferenciyaǵa Qazaqstan, Tájikistan, Qırǵızstan, Túrkiya, Iran Islam Respublikası, Rossiya Federaciyası, Qıtay Xalıq Respublikası, Belarus, Hindistan, Gruziya, Armeniya, Pakistan Islam Respublikası, Avstriyadan wákiller, sonday-aq, xalıqaralıq shólkemlerdiń mámleketlik strukturalarınıń hám jámiyetlik shólkemleriniń basshıları qatnastı.

Ilajda jas áwladtıń fizikalıq ruwxıy salamat rawajlanıwı, analar hám balalardıń densawlıǵın qorǵaw mámleketlik siyasattıń baslı baǵdarlarınıń biri ekenligi atap ótilgen.
Bunday iygilikli isler ata-babalarımızdıń adamgershilik dástúrlerinen kúsh aladı.
— Gurbangulı Berdimuxamedov atındaǵı qayırqomlıq qorınıń jumısı mende úlken tásir qaldırdı — bul balalarǵa ǵamqorlıq, juwapkershilik hám shın súyispenshiliktiń ayqın kórinisi, — deydi Saida Mirziyoeva. — Búgingi forum keleshek áwladlar mápi ushın birgelikte islesiw, tájiriybe almasıw hám óz-ara nátiyjeli baylanıslar ushın jańa imkaniyatlar ashatuǵınına bekkem isenemen. Biz birge islesiwge bárqulla tayarmız hám birgelikte perzentlerimiz ushın bunnan da kóbirek jumıslardı isley alıwımızǵa bekkem isenemen. Sebebi olardıń baxtı — biziń ulıwma keleshegimiz.

Behruz Xudoyberdiev tayarladı.
ÓzA