Ózbekstan Respublikası Prezidenti Shavkat Mirziyoev Múbárek Ramazan hayıtın belgilew aldında xalqımızǵa tán jaqsılıq, keńpeyillik, adamgershilik, miyrim-shápáát hám keshirimli bolıw sıyaqlı ullı pazıyletlerdiń ayqın belgisi sıpatında «Jaza múddetin ótep atırǵan, qılmısına shın kewilden pushayman bolǵan hám dúzeliw jolına bekkem bel baylaǵan bir topar shaxslardı ápiw etiw haqqında»ǵı Pármanına qol qoydı.

Pármanǵa muwapıq, Ózbekstan Respublikası Konstituciyasınıń 109-statyası 23-bántine tiykarlanıp jaza múddetin ótep atırǵan hám qılmısına shın kewilden pushayman bolǵan hám dúzeliw jolına bekkem bel baylaǵan 488 puqara ápiw etildi.

Ápiw etilgen puqaralardıń 100i tiykarǵı jazadan tolıq azat etildi, 268i jazanı ótewden múddetinen aldın shártli azat etildi, 34 iniń erkinen ayırıw jazası jeńilirek jaza menen almastırıldı. Sonday-aq, 86 puqaraǵa tayınlanǵan erkinen ayırıw jazasınıń múddetleri qısqartıldı.

Ápiw etilgenlerdiń 17 sin sırt el puqaraları, 37sin hayal-qızlar, 37sin 60 jastan asqan er adamlar, 167 sin jaslar (solardan, 1 ewi jas óspirim) hám 5 ewin qadaǵan etilgen shólkemler jumısında qatnasqan puqaralar quraydı.

Pármannıń orınlanıwı boyınsha ápiw etilgen puqaralardı shańaraǵı hám jaqınlarınıń qushaǵına qaytarıw, jámiyetlik turmısqa beyimlesip, paydalı miynet penen shuǵıllanıwı, salamat turmıs tárizin jolǵa qoyıp, jámiyette múnásip orın tabıwı ushın olarǵa járdem beriw boyınsha juwapker ministrlikler hám uyımlarǵa tiyisli tapsırmalar berildi.

ÓzA