Awıl xojalıǵı ministri Ibrohim Abdurahmonov hám Qorǵanıw ministri, general-mayor Shuhrat Xolmuhamedov arasında ushırasıw bolıp ótti.

Ushırasıw aldında Ibrohim Abdurahmonov Prezidentimizdiń awıl xojalıǵı tarawındaǵı aqılǵa uǵras siyasatı nátiyjesinde jer hám suw resurslarınan nátiyjeli paydalanıw, xalıqtı tiykarǵı azıq-awqat ónimleri menen támiyinlew, eksport kólemin arttırıw, bazardaǵı bahanıń turaqlılıǵın saqlaw hám diyqanlardıń dáramatın kóbeytiw boyınsha sistemalı jumıslar ámelge asırılıp atırǵanın atap ótti.
Sóylesiw dawamında eki tárepleme birge islesiwdi jáne de rawajlandırıw, óz-ara qatnasıqlar perspektivaların belgilew, jumıs baǵdarlarına baylanıslı nızamshılıq hújjetlerinde názerde tutılǵan nátiyjelerge erisiw máseleleri dodalandı. Sonday-aq, Qorǵanıw ministrligi áskerlerinde tarawǵa baylanıslı maman kadrlardı tayarlaw hám zamanagóy texnologiyalardı engiziw boyınsha pikir alısıldı.
Ushırasıwda birge islesiwge jańa sapa baǵıshlaw, dástúriy doslıq qatnasıqlardı jáne de bekkemlew hám barlıq baǵdarlarda birge islesiwdi keńeytiw boyınsha kelisimlerge erisildi. Sonday-aq, Awıl xojalıǵı ministrligi hám Qorǵanıw ministrligi arasında birge islesiwdi bekkemlew boyınsha memorandumǵa qol qoyıldı.
Memorandumǵa bola, Qorǵanıw ministrligi egislik jerlerden nátiyjeli paydalanıw, awıl xojalıǵı qánigeleri qatnasıwında agrotexnikalıq ilajlardı ámelge asırıw, sharwashılıqtı rawajlandırıw hám azıq-awqat qáwipsizligi boyınsha málimleme hám tájiriybe almasıw jolǵa qoyıladı. Bunnan tısqarı, qánigeler ushın treningler shólkemlestiriw, egislik maydanları hám jaylawlardan únemli paydalanıw, ónimdarlıqtı arttırıw, tuqımgershilikti rawajlandırıw hám organikalıq awıl xojalıǵı ónimlerin jetistiriw sıyaqlı baǵdarlarda birge islesiw ámelge asırıladı.

Muhayyo Toshqoraeva, ÓzA