Ember analitikalıq orayınıń xabar beriwinshe, ótken jılı Evropa Awqamı mámleketleri Rossiya gaz importın 2023-jılǵa qaraǵanda 18 procentke arttırǵan. Italiya, Franciya hám CHexiya bolsa Rossiyadan eń kóp janılǵı satıp alǵan.

Hújjette aytılıwınsha, suyılttırılǵan gaz jetkerip beriw de kóbeygen.
Oraydıń maǵlıwmatlarına bola, ótken jılı Evropa Awqamı Rossiyadan 21,9 milliard evroǵa janılǵı satıp alǵan. Bul Ukrainaǵa Evropa Awqamı tárepinen berilgen finanslıq járdem muǵdarınan bir neshe milliard kóp, bul mámleketler Ukrainaǵa 18,7 milliard evro jumsaǵan.
Ekonomikalıq baqlawshı Aleksey Kalmikovtıń túsindirgenindey, 2021-jılı Rossiya gaziniń Evropa importındaǵı úlesi 45 procentti quradı. 2022-jıldan ol 24 procentke, 2023-jılı bolsa 15 procentke azayadı. Sonıń menen birge, 2025-jıldıń basınan berli Ukraina Rossiya gaziniń Evropaǵa tranzitin toqtattı.
Házirgi waqıtta Evropa Awqamı Rossiyadan qazıp alınatuǵın uglevodorodlar importın basqıshpa-basqısh toqtatıw strategiyasın islep shıqpaqta. Strategiya kelesi háptelerde usınıs etiliwi kútilmekte.

Qaraqalpaqstan xabar agentligi