Ózbekstan Respublikası Prezidenti Shavkat Mirziyoev 27-mart kúni Evropa Awqamınıń Sırtqı isler hám qáwipsizlik siyasatı boyınsha joqarı wákili, Evropa komissiyası vice-prezidenti Kaya Kallas basshılıǵındaǵı delegaciyanı qabıl etti.

Ámeliy birge islesiwdi keńeytiw hám bolajaq birgeliktegi ilajlarǵa tayarlıq kóriw máseleleri kórip shıǵıldı.
Ushırasıw aldında joqarı mártebeli miyman mámleketimiz basshısına Evropa keńesi Prezidenti Antoniu Koshta hám Evropa komissiyası Prezidenti Ursula fon der Lyayenniń sálemin hám eń jaqsı tileklerin jetkerdi.
Usı jıl 3-4-aprel kúnleri Samarqand qalasında «Oraylıq Aziya – Evropa Awqamı» birinshi sammiti ilajların ótkeriw máselelerine ayrıqsha itibar qaratıldı. Ashxabad qalasında ótken ministrler dárejesindegi kóp tárepleme ushırasıwdıń nátiyjeli juwmaqları joqarı bahalandı.
Sawda hám logistika, sonıń ishinde, Transkaspiy transport koridorınıń potencialın ámelge shıǵarıw, sanlastırıw, «jasıl» energetika, ekologiya, infrastrukturanı mojernizaciyalaw hám basqa tiykarǵı baǵdarlarda eki region arasındaǵı óz-ara paydalı birge islesiwdi alǵa qoyıw, baslama hám joybarlardı ámelge asırıwdıń nátiyjeli mexanizmlerin engiziw áhmiyetli ekenligi atap ótildi.
Ózbekstannıń EA institutları menen qatnasıqların jáne de tereńlestiriw máseleleri kórip shıǵıldı.
Keńeytilgen sheriklik hám birge islesiw haqqındaǵı jańa kelisimdi qabıl etiw hám mámleketimizdiń jáhán sawda shólkemine qosılıwı máseleleri dodalandı.
Xalıqaralıq hám regionallıq siyasattıń áhmiyetli máseleleri boyınsha da pikir alısıldı.

ÓzA